ఉత్తర టెక్సాస్ తెలుగు సంఘం (TANTEX) ఆధ్వర్యంలో నిర్వహిస్తున్న "గానసుధ – మన టాంటెక్స్ రేడియో" ఆధ్యాత్మిక కార్యక్రమంలో కొనసాగుతున్న "ద్వాదశ జ్యోతిర్లింగాల దివ్య వైభవం" ప్రత్యేక శ్రేణిలో ఏడో ఎపిసోడ్గా రామేశ్వరం జ్యోతిర్లింగం మహిమను శ్రోతలకు అందించనున్నారు. ఈ ప్రత్యేక కార్యక్రమం జూలై 19, 2026 (ఆదివారం) సాయంత్రం 5:00 నుంచి 6:00 గంటల వరకు (CST) రేడియో ఆజాద్ 107.9 FM HD4లో ప్రసారం కానుంది. ఈ కార్యక్రమాన్ని ప్రముఖ రేడియో జాకీ పరిమళ మార్పాక నిర్వహించనున్నారు.
హిందూ ధర్మంలో అత్యంత పవిత్రమైన క్షేత్రాలలో ఒకటైన రామేశ్వరం జ్యోతిర్లింగం విశిష్టత, దాని పురాణ ప్రాముఖ్యత, ఆలయ వైభవం, భక్తి సంప్రదాయాలను ఈ ఎపిసోడ్లో విశ్లేషణాత్మకంగా వివరించనున్నారు. లంక విజయానంతరం శ్రీరాముడు స్వయంగా ప్రతిష్ఠించి పూజించిన జ్యోతిర్లింగంగా రామేశ్వరం ప్రత్యేక స్థానాన్ని సంపాదించుకుంది. ఈ క్షేత్రంలో రామేశ్వరుడిగా పూజలందుకుంటున్న పరమశివుని మహిమ, ఆలయ చరిత్ర, ఆధ్యాత్మిక సందేశాలు శ్రోతలకు అందించనున్నారు.
ఆధ్యాత్మిక చింతనతో పాటు పురాణ గాథలను ఆస్వాదించాలనుకునే భక్తులకు ఈ కార్యక్రమం ఒక అరుదైన అవకాశంగా నిలవనుంది. స్థానికంగా 107.9 FM HD4లో వినవచ్చు. అలాగే రేడియో ఆజాద్ యాప్ ద్వారా ప్రపంచంలోని ఎక్కడి నుంచైనా ఈ ప్రత్యేక ప్రసారాన్ని ఆస్వాదించే అవకాశం ఉందని నిర్వాహకులు తెలిపారు.
