అది ఒక అందమైన పచ్చిక మైదానం. వర్షాకాలం కావడంతో మరింత ఆకర్షణీయంగా ఉంది. పచ్చిక బాగా ఉండడంతో ఒక గొర్రెల కాపరి తన గొర్రెలను మేపడానికి అక్కడికి వచ్చాడు. అతను చెట్టుక్రింద కూర్చుని ఉండగా గొర్రెలన్నీ పచ్చిక మేస్తున్నాయి.
ఆ మందలో కొన్ని గొర్రెపిల్లలు కూడా ఉన్నాయి. వాటిని చూసిన ఒక డేగ పై నుండి ఎగురుకుంటూ వచ్చి ఒక గొర్రెపిల్లను తన బలమైన గోర్లతో పైకి లేపి గూటిలోకి తీసుకెళ్లింది. అదంతా గమనిస్తున్న ఓ కాకి తనకిక సులభంగా భోజనం దొరుకుతుంది అనుకుంది. "నేను కూడా డేగలా ఎగరగలను, నాకు కూడా బలమైన గోర్లున్నాయి. నేనెందుకు గొర్రెలను కబళించుకుపోలేను?" అని అనుకున్న కాకి, ఎగురుకుంటూ వచ్చి ఒక బలిష్ఠమైన గొర్రెమీద దాడి చేసింది.
అంతే, దాని గోర్లు, కాళ్లు ఆ గొర్రె ఉన్నిలో చిక్కుకుపోవడంతో గొర్రెలన్నీ అరవడం మొదలుపెట్టాయి. గొర్రెల అరుపులు విన్న కాపరి కాకిని చూశాడు. పరుగున వచ్చి దానిని పట్టుకుని ఒక పంజరంలో బంధించి తన పిల్లలకు 'పెంపుడు కాకి''లా బహుకరించాడు.
