ఆలెంటౌన్లోని హిందూ టెంపుల్ సొసైటీ ఆధ్వర్యంలో ఉగాది సంబరాలు భక్తి భరిత వాతావరణంలో అంగరంగ వైభవంగా నిర్వహించబడ్డాయి. స్థానికంగా నివసిస్తున్న తెలుగు ప్రజలు భారీ సంఖ్యలో హాజరై వేడుకలకు విశేష ఉత్సాహాన్ని తీసుకువచ్చారు. సుమారు 400 మందికి పైగా తెలుగు వాసులు ఈ కార్యక్రమంలో పాల్గొన్నారు.
కార్యక్రమం పూజారి ఆనంద్ జీ గారి మంత్రోచ్ఛారణల మధ్య నిర్వహించిన ప్రత్యేక పూజలతో ప్రారంభమైంది. అనంతరం గణపతి స్తోత్రంతో వేడుకలకు శ్రీకారం చుట్టగా, సభావేదిక సాంప్రదాయ సోయగాలతో కళకళలాడింది. తెలుగు జానపద గీతాలు, ఆధునిక సంగీతానికి అనుగుణంగా అందించిన నృత్య ప్రదర్శనలు ప్రేక్షకులను అలరించాయి.
ఈ సందర్భంగా నిర్వహించిన మహిళల ఫ్యాషన్ షో ప్రత్యేక ఆకర్షణగా నిలిచింది. 35 మంది మహిళలు సాంప్రదాయ మరియు ఆధునిక వేషధారణలో పాల్గొని అందరినీ ఆకట్టుకున్నారు. పంచాంగ పఠనం, తెలుగు పద్యాల వాచనం కార్యక్రమానికి సాంస్కృతిక మాధుర్యాన్ని జోడించాయి.
హిందూ టెంపుల్ విస్తరణ కోసం నిధుల సమీకరణ లక్ష్యంగా ఈ ఉగాది వేడుకలను నిర్వహించినట్లు నిర్వాహకులు తెలిపారు. ఈ సందర్భంగా అనేక మంది తెలుగు కుటుంబాలు, స్పాన్సర్లు ముందుకు వచ్చి ఉదారంగా విరాళాలు అందజేశారు.
ఇదే మొదటిసారిగా పురుషులు, మహిళల కోసం ఇండోర్ మరియు అవుట్డోర్ క్రీడలను ఏర్పాటు చేయడం విశేషం. వివిధ క్రీడల్లో విజేతలైన వారికి ట్రోఫీలు అందజేసి సత్కరించారు.
కార్యక్రమం విజయవంతం కావడానికి కృషి చేసిన వేదిక అలంకరణ విభాగం, ఆర్థిక నిర్వహణ బృందం, బ్రోచర్ ముద్రణ, ఫుడ్ కమిటీ, క్రీడా కమిటీ, నిధుల సమీకరణ కమిటీ తదితర విభాగాల సభ్యులను వేదికపైకి ఆహ్వానించి నిర్వాహకులు డా. చటర్జీ కాజ, వెంకట్ వీరశెట్టి, మాధురి గుమ్మడి, కామరాజు రామోజు అభినందించారు.
మొత్తంగా, ఈ ఉగాది వేడుకలు విదేశీ నేలపై తెలుగు సంస్కృతి, సంప్రదాయాలను ప్రతిబింబిస్తూ, పాల్గొన్న వారందరికీ చిరస్మరణీయ అనుభూతిని మిగిల్చాయి.
