నాని, దర్శకుడు శ్రీకాంత్ ఓదెల కాంబినేషన్‌లో తెరకెక్కిన ‘ది ప్యారడైజ్’ భారీ అంచనాల మధ్య థియేటర్లలో విడుదలైంది. ‘దసరా’ తర్వాత ఈ ఇద్దరి కాంబినేషన్‌లో వచ్చిన సినిమా కావడంతో దీనిపై ప్రేక్షకుల్లో ఆసక్తి నెలకొంది. 1980ల నాటి హైదరాబాద్‌లోని ప్యారడైజ్ ప్రాంతంలో నివసించే సావరి కమ్యూనిటీ చుట్టూ కథ సాగుతుంది. గుర్తింపు, హక్కుల కోసం పోరాడుతున్న ఈ సమాజంపై మాలిక్ అనే శక్తివంతమైన వ్యక్తి ఆధిపత్యం కొనసాగిస్తుంటాడు. ఈ వ్యవస్థను సవాలు చేసేందుకు జాదల్ అనే యువకుడు జైలుశిక్ష అనంతరం తిరిగి వస్తాడు. జాదల్ పాత్రలో నాని పూర్తిగా కొత్త లుక్, బాడీ లాంగ్వేజ్‌తో కనిపించారు. కోపం, ఆవేదన, తిరుగుబాటు భావాలను తన నటనతో బలంగా చూపించారు. ముఖ్యంగా సినిమా ప్రారంభ భాగంలో ఆయన స్క్రీన్ ప్రెజెన్స్ ప్రేక్షకులను ఆకట్టుకునేలా ఉంది. ఫస్ట్ హాఫ్‌లో బలమైన ప్రపంచం సినిమా ఫస్ట్ హాఫ్ ప్రధాన బలంగా నిలుస్తుంది. దర్శకుడు శ్రీకాంత్ ఓదెల సావరి కమ్యూనిటీకి ప్రత్యేకమైన ప్రపంచాన్ని సృష్టించారు. సాధారణ కమర్షియల్ సినిమాలకు భిన్నమైన వాతావరణం, పాత్రల పరిచయం, సంఘర్షణను ఆసక్తికరంగా ఏర్పాటు చేశారు. జాదల్, అతని తల్లి మధ్య సంబంధం కథకు ఎమోషనల్ లేయర్‌ను జోడిస్తుంది. మాలిక్ పాత్రలో మోహన్ బాబు, మరో కీలక పాత్రలో రాఘవ్ జుయల్ తమదైన ముద్ర వేస్తారు. సెకండాఫ్‌లో తగ్గిన ఇంపాక్ట్ ఇంటర్వెల్ తర్వాత మాత్రం సినిమా గాడి తప్పినట్లు అనిపిస్తుంది. జాదల్, మాలిక్ మధ్య ప్రధాన సంఘర్షణను మరింత బలంగా నిర్మించాల్సిన చోట కథ వరుస హింసాత్మక సన్నివేశాల వైపు మళ్లుతుంది. జాదల్ ఎదుర్కొనే సమస్యలు, కమ్యూనిటీ పోరాటం, మాలిక్ ఆధిపత్యం వంటి అంశాలు ఆసక్తికరంగా ఉన్నప్పటికీ.. వాటన్నింటినీ ఒక బలమైన డ్రామాగా కలపడంలో స్క్రీన్‌ప్లే తడబడినట్లు కనిపిస్తుంది. జాదల్, మాలిక్ చివరకు ఎదురెదురుగా నిలిచే సమయంలో కూడా మొదటి భాగం సృష్టించిన స్థాయిలో భావోద్వేగ ప్రభావం కనిపించదు. హీరో–విలన్ సంఘర్షణకు మరింత డ్రామా, ఎమోషన్ అవసరమైందనే అభిప్రాయం వ్యక్తమవుతోంది. హింస ఎక్కువ.. ఎమోషన్ తక్కువ సినిమా మొత్తం డార్క్, రా టోన్‌ను కొనసాగించడం ప్రత్యేకతగా నిలుస్తుంది. అయితే సెకండాఫ్‌లో హింసాత్మక సన్నివేశాలు పదేపదే రావడంతో ప్రధాన కథ, పాత్రల ఎమోషన్స్ వెనక్కి వెళ్లిపోయినట్లు అనిపిస్తుంది. తెలంగాణ రాజకీయ ఉద్యమానికి సంబంధించిన కొన్ని సూచనలు కూడా సినిమాలో కనిపిస్తాయి. అయితే అవి ప్రధాన సావరి కమ్యూనిటీ కథతో పూర్తిగా కలిసిపోకపోవడంతో కథనం నుంచి ప్రేక్షకుడి దృష్టిని మరల్చే సందర్భాలు ఉన్నాయి. నాని పెర్ఫార్మెన్స్ ప్లస్ సినిమాకు నాని పెర్ఫార్మెన్స్ ప్రధాన బలంగా నిలుస్తుంది. జాదల్ పాత్ర కోసం ఆయన లుక్, హెయిర్‌స్టైల్, బాడీ లాంగ్వేజ్‌లో చేసిన మార్పులు స్పష్టంగా కనిపిస్తాయి. అనిరుధ్ రవిచందర్ సంగీతం, భారీ యాక్షన్ సన్నివేశాలు, విజువల్ ట్రీట్ సినిమా స్థాయిని పెంచే అంశాలుగా నిలుస్తాయి.