అమెరికా వ్యతిరేక నినాదాలు, వ్యాఖ్యలు చేసే వారిపై US వీసా ప్రక్రియలో మరింత పరిశీలన ఉండవచ్చని భారత్లోని అమెరికా రాయబారి సెర్జియో గోర్ హెచ్చరించారు.
ఎకనామిక్ టైమ్స్ నిర్వహించిన ఓ కార్యక్రమంలో మాట్లాడిన గోర్.. “Death to America” వంటి నినాదాలను బహిరంగంగా ప్రచారం చేసే వ్యక్తులు అమెరికా వీసా కోసం దరఖాస్తు చేసినప్పుడు ప్రశ్నలు ఎదుర్కోవాల్సి రావచ్చని అన్నారు.
అమెరికా వ్యతిరేక వ్యాఖ్యలు చేసి వీసా ఎలా?
అమెరికాపై బహిరంగంగా తీవ్ర వ్యతిరేకత వ్యక్తం చేస్తూ.. అదే సమయంలో అమెరికాలోకి ప్రవేశించేందుకు వీసా కోరడం ఎలా సాధ్యమని గోర్ ప్రశ్నించారు.
ప్రతి దేశానికీ తమ దేశంలోకి ఎవరిని అనుమతించాలనే విషయంలో నిర్ణయం తీసుకునే హక్కు ఉంటుందని ఆయన అన్నారు. అమెరికా కూడా వీసా దరఖాస్తుదారుల నేపథ్యం, పరిస్థితులు, ప్రవర్తనను పరిశీలించిన తర్వాతే వీసా మంజూరు చేస్తుందని స్పష్టం చేశారు.
వీసా స్క్రీనింగ్పై పెరుగుతున్న దృష్టి
ఇటీవలి కాలంలో అమెరికా వీసా, ఇమ్మిగ్రేషన్ విధానాలపై ఎక్కువగా చర్చ జరుగుతోంది. ఈ నేపథ్యంలో వీసా దరఖాస్తుదారులు తమ దరఖాస్తు ప్రక్రియలో అదనపు పరిశీలనకు సిద్ధంగా ఉండాలని గోర్ వ్యాఖ్యలు సూచిస్తున్నాయి.
అమెరికా వీసా మంజూరు అనేది ఆటోమేటిక్ హక్కు కాదని, ప్రవేశానికి సంబంధించిన నిర్ణయం అమెరికా అధికారుల పరిధిలో ఉంటుందని ఆయన పేర్కొన్నారు.
NASA-ISRO సహకారంపై కూడా వ్యాఖ్యలు
ఇదే కార్యక్రమంలో సెర్జియో గోర్ NASA-ISRO అంతరిక్ష సహకారం గురించి కూడా మాట్లాడారు.
భవిష్యత్ చంద్ర మిషన్లలో భారత్ భాగస్వామ్యం కావడానికి NASA ఆహ్వానించిందని ఆయన తెలిపారు. అంతరిక్ష రంగంలో భారత్కు ఉన్న సాంకేతిక సామర్థ్యాలు ఇలాంటి మిషన్లకు ఉపయోగపడతాయని పేర్కొన్నారు.
మీడియా కథనాలపై అసంతృప్తి
భారత మీడియా ప్రచురిస్తున్న కొన్ని వార్తలపై కూడా గోర్ అసంతృప్తి వ్యక్తం చేశారు. తాను చూసిన కొన్ని కథనాలు వాస్తవ పరిస్థితులకు భిన్నంగా ఉన్నాయని ఆయన వ్యాఖ్యానించారు.
