అమెరికా-ఇరాన్ మధ్య మరోసారి తీవ్ర ఉద్రిక్తతలు నెలకొన్నాయి. ఇరాన్లోని లారక్ ద్వీపంపై అమెరికా దాడి చేసిన అనంతరం.. ఇరాన్ జోర్డాన్లోని అమెరికా సైనిక స్థావరాలపై ప్రతీకార దాడులు చేసింది. దీనికి అమెరికా అధ్యక్షుడు డొనాల్డ్ ట్రంప్ తీవ్ర హెచ్చరిక జారీ చేశారు.
లారక్ ద్వీపంలో రెండు ఇరానియన్ రాకెట్ లాంచర్లను అమెరికా దళాలు లక్ష్యంగా చేసుకున్నాయి. ఇవి హార్ముజ్ జలసంధిలో నౌకాదళ మైన్లను ప్రయోగించేందుకు సిద్ధమవుతున్నాయని అమెరికా పేర్కొంది.
జోర్డాన్లో అమెరికా స్థావరాలపై ఇరాన్ దాడి
అమెరికా దాడికి ప్రతీకారంగా ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) జోర్డాన్లోని అమెరికా స్థావరాలపై క్షిపణులు, డ్రోన్లతో దాడి చేసినట్లు ప్రకటించింది.
లారక్ ద్వీపంపై అమెరికా దాడిలో ఇరాన్ సైనికులు, పౌరులు మరణించారని, గాయపడ్డారని ఇరాన్ పేర్కొంది. దానికి ప్రతిస్పందనగానే ఈ దాడి చేపట్టినట్లు తెలిపింది.
అయితే జోర్డాన్ సైన్యం మాత్రం తమ వాయు రక్షణ వ్యవస్థలు 8 ఇరానియన్ క్షిపణులను అడ్డుకున్నాయని వెల్లడించింది. లక్ష్యంగా చేసుకున్న స్థావరాల్లో ప్రాథమికంగా ఎలాంటి గాయాలు నమోదు కాలేదని తెలిపింది.
ఇరాన్ తన దాడిని ఆత్మరక్షణ చర్యగా పేర్కొంటుండగా.. హార్ముజ్ జలసంధిలో వాణిజ్య నౌకలు, పౌరుల భద్రత కోసం పరిమిత దాడి చేశామని అమెరికా చెబుతోంది.
‘గట్టిగా దాడి చేస్తాం’.. ట్రంప్ హెచ్చరిక
జోర్డాన్లో అమెరికా స్థావరాలపై ఇరాన్ దాడి అనంతరం ట్రంప్ తీవ్రంగా స్పందించారు.
‘మేము వారిపై గట్టిగా దాడి చేస్తాం’ అంటూ ఫాక్స్ న్యూస్తో మాట్లాడుతూ ఇరాన్కు హెచ్చరిక జారీ చేశారు. దీంతో అమెరికా తదుపరి సైనిక చర్యకు సిద్ధమవుతోందన్న ఆందోళనలు పెరిగాయి.
ఇరాన్ను ‘ఫెయిల్డ్ నేషన్’గా అభివర్ణిస్తూ ట్రంప్ సోషల్ మీడియాలో కూడా తీవ్ర వ్యాఖ్యలు చేశారు. ఇరాన్ నాయకత్వంపై ఆయన విమర్శలు కొనసాగించారు.
UAE కూడా ఉద్రిక్తతల మధ్యలోకి
తాజా ఘర్షణ అమెరికా, ఇరాన్, జోర్డాన్కే పరిమితం కాలేదు.
ఇరాన్ సైన్యం యునైటెడ్ అరబ్ ఎమిరేట్స్లోని అల్ మెన్హాద్ ఎయిర్బేస్లో ఉన్న అమెరికా సైనిక ఆస్తులను డ్రోన్లతో లక్ష్యంగా చేసుకున్నట్లు తెలిపింది.
అయితే UAE మాత్రం తమ ఎయిర్బేస్పై దాడి జరిగిందన్న వార్తలను ఖండించింది. ఇరాన్ వైపు నుంచి UAE భూభాగ జలాల్లోకి వచ్చిన ఓ డ్రోన్ను తమ వైమానిక దళాలు అడ్డుకున్నాయని రక్షణ మంత్రిత్వ శాఖ తెలిపింది.
గల్ఫ్ దేశాలు, జోర్డాన్పై దాడులను నిలిపివేసి ఉద్రిక్తతలను తగ్గించాలని UAE పిలుపునిచ్చింది.
హార్ముజ్ జలసంధి.. మరోసారి కీలక ఫ్లాష్పాయింట్
తాజా ఘర్షణలతో హార్ముజ్ జలసంధిపై ఆందోళనలు మరింత పెరిగాయి.
ప్రపంచంలోని అత్యంత కీలకమైన చమురు రవాణా మార్గాల్లో ఇది ఒకటి. లారక్ ద్వీపంలోని ఇరానియన్ రాకెట్ లాంచర్లు ఈ జలసంధిలో నౌకాదళ మైన్లను ప్రయోగించే సామర్థ్యంతో ఉన్నాయని అమెరికా ఆరోపించింది.
ఇరాన్ కూడా ఈ ప్రాంతంలో నౌకా రవాణాకు అంతరాయం కలిగించే సామర్థ్యాన్ని గతంలో ప్రదర్శించింది.
తాజా అమెరికా-ఇరాన్ ఘర్షణల నేపథ్యంలో అంతర్జాతీయ చమురు ధరలు కూడా పెరిగాయి, దీంతో ప్రపంచ ఇంధన సరఫరాలపై ఆందోళనలు వ్యక్తమవుతున్నాయి.
దౌత్య ప్రయత్నాలకు మరో ఎదురుదెబ్బ
అమెరికా, ఇరాన్ మధ్య ఉద్రిక్తతలను తగ్గించేందుకు ఒమన్, పాకిస్థాన్, ఖతార్ వంటి దేశాలు ఇటీవల దౌత్య ప్రయత్నాలు చేస్తున్నాయి.
అయితే తాజా దాడులు, ప్రతిదాడులు ఆ చర్చలకు మరోసారి అడ్డంకిగా మారే అవకాశం ఉంది.
ప్రస్తుతం పరిస్థితి అత్యంత ఉద్రిక్తంగా ఉంది. ట్రంప్ ఇచ్చిన హెచ్చరిక నేపథ్యంలో అమెరికా తదుపరి చర్య ఏంటన్నదే ఇప్పుడు కీలకంగా మారింది. తాజా ఘర్షణలు పరిమిత స్థాయిలోనే ఆగుతాయా? లేక మధ్యప్రాచ్యంలోని మరిన్ని దేశాలకు యుద్ధం విస్తరిస్తుందా? అన్నది రాబోయే గంటల్లో తేలనుంది.
