భారత్లో ఊబకాయం (Obesity) బాధితుల సంఖ్య వేగంగా పెరుగుతోందని ది లాన్సెట్ (The Lancet) జర్నల్ తాజా అధ్యయనం వెల్లడించింది. ఈ సమస్యలో అత్యంత ఆందోళనకర అంశం ఏమిటంటే, బాధితుల్లో ఎక్కువ మంది చిన్నారులు మరియు కౌమార వయస్కులే కావడం.
నివేదిక ప్రకారం, 1990లో భారత్లో ఊబకాయ బాధితులు 0.4 మిలియన్లు ఉండగా, 2022 నాటికి ఈ సంఖ్య 12.5 మిలియన్లకు చేరింది. ఇందులో 5–19 ఏళ్ల వయసు గల పిల్లలు, యుక్తవయస్కులే ఎక్కువగా ఉన్నారు. మొత్తం 12.5 మిలియన్లలో 7.3 మిలియన్లు బాలురు, 5.2 మిలియన్లు బాలికలు ఉన్నట్లు అధ్యయనం పేర్కొంది.
ప్రపంచవ్యాప్తంగా కూడా పిల్లలు, పెద్దలు కలిపి ఒక బిలియన్కు పైగా మంది ఊబకాయంతో బాధపడుతున్నారని నివేదిక తెలిపింది. అదే సమయంలో అనేక మంది ఇంకా పోషకాహార లోపంతో బాధపడుతున్నారని, ఇది ప్రభుత్వాలకు పెద్ద సవాల్గా మారిందని నిపుణులు హెచ్చరించారు.
వయోజనుల్లో కూడా ఊబకాయం రేటు గణనీయంగా పెరిగింది. భారతదేశంలో 1990లో 1.2 శాతం ఉన్న వయోజన ఊబకాయం, 2022 నాటికి 9.8 శాతానికి చేరింది. మహిళల్లో 44 మిలియన్లు, పురుషుల్లో 26 మిలియన్లు ఊబకాయంతో బాధపడుతున్నట్లు అంచనా.
నిపుణుల ప్రకారం, ఫాస్ట్ ఫుడ్, అధిక కేలరీల ఆహారం, స్వీట్లు, కూల్ డ్రింక్స్ వినియోగం, శారీరక శ్రమ తగ్గడం, మొబైల్–టీవీ వినియోగం పెరగడం వంటి కారణాలు ఊబకాయం పెరగడానికి ప్రధానంగా కారణమవుతున్నాయి. జన్యుపరమైన కారణాలు, ఒత్తిడి, హార్మోన్ల మార్పులు కూడా ప్రభావం చూపుతున్నాయని వారు చెబుతున్నారు.
పిల్లలు ఆరోగ్యంగా ఉండేందుకు సమతుల్య ఆహారం, క్రమం తప్పని వ్యాయామం అవసరమని వైద్య నిపుణులు సూచిస్తున్నారు
