అమెరికాలో న్యాయవ్యవస్థ స్వతంత్రతపై కొనసాగుతున్న చర్చల మధ్య మాజీ న్యాయమూర్తులు కీలక ముందడుగు వేశారు. దేశం 250వ స్వాతంత్ర్య వార్షికోత్సవాన్ని పురస్కరించుకుని పలువురు రిటైర్డ్ న్యాయమూర్తులు, న్యాయ నిపుణులు కలిసి ప్రజల్లో న్యాయవ్యవస్థ ప్రాముఖ్యతను వివరించే ప్రత్యేక బస్సు యాత్రను నిర్వహిస్తున్నారు. ఈ యాత్ర పెన్సిల్వేనియా, ఒహాయో, మిచిగన్ రాష్ట్రాల మీదుగా సాగుతోంది.
ఈ కార్యక్రమంలో పాల్గొంటున్న న్యాయమూర్తులు ప్రజాస్వామ్యంలో స్వతంత్ర న్యాయవ్యవస్థ అత్యంత కీలకమని, కోర్టులపై ప్రజల నమ్మకం దెబ్బతింటే చట్టపరమైన వ్యవస్థ బలహీనపడే ప్రమాదం ఉందని హెచ్చరిస్తున్నారు. న్యాయమూర్తుల పాత్రపై తప్పుడు ప్రచారం, రాజకీయీకరణ, ప్రజల్లో అపోహలు పెరగడం వంటి అంశాలపై వారు ఆందోళన వ్యక్తం చేస్తున్నారు.
'జస్టిస్ ఇన్ మోషన్' పేరుతో నిర్వహిస్తున్న ఈ యాత్రలో మాజీ న్యాయమూర్తులతో పాటు మాజీ ప్రభుత్వ అధికారులు, న్యాయవాదులు కూడా పాల్గొంటున్నారు. కోర్టులు ఎలా పనిచేస్తాయి, న్యాయవ్యవస్థ ఎందుకు స్వతంత్రంగా ఉండాలి వంటి అంశాలపై ప్రజలతో నేరుగా చర్చిస్తూ అవగాహన పెంచే ప్రయత్నం చేస్తున్నారు.
ఇటీవలి కాలంలో అమెరికాలో న్యాయవ్యవస్థపై విమర్శలు, రాజకీయ వ్యాఖ్యలు, న్యాయమూర్తులకు వస్తున్న బెదిరింపులు పెరుగుతున్న నేపథ్యంలో ఈ కార్యక్రమం ప్రాధాన్యం సంతరించుకుంది. ప్రజాస్వామ్య వ్యవస్థ బలోపేతానికి చట్ట పాలన, నిష్పాక్షిక న్యాయవ్యవస్థ అత్యవసరమని నిర్వాహకులు పేర్కొన్నారు.
