అమెరికాలో ఒక క్యాన్సర్ మాత్ర ధర దాదాపు రూ.85 వేలు... అదే మందు భారత్లో కేవలం రూ.35కే లభిస్తుందంటే నమ్మగలరా? ఈ విషయాన్ని ఓ అమెరికన్ మహిళ బయటపెట్టడంతో ఇప్పుడు ప్రపంచవ్యాప్తంగా చర్చ మొదలైంది.
ప్రస్తుతం భారత్లో నివసిస్తున్న అమెరికన్ మహిళ లిజ్ సోషల్ మీడియాలో పోస్ట్ చేసిన వీడియో వైరల్గా మారింది. తన అత్త బ్లడ్ క్యాన్సర్ చికిత్స కోసం వాడుతున్న రెవ్లిమిడ్ అనే ఔషధం అమెరికాలో ఒక్క మాత్ర ధర సుమారు 900 డాలర్లు, అంటే దాదాపు రూ.85 వేల అని ఆమె తెలిపారు.
అయితే, అదే ఔషధానికి సంబంధించిన జెనరిక్ వెర్షన్ భారత్లో రూ.35 నుంచి రూ.300 మధ్య లభిస్తోందని చెప్పి ఆశ్చర్యం వ్యక్తం చేశారు. "అమెరికాలో మమ్మల్ని దోచుకుంటున్నారు" అంటూ ఆమె చేసిన వ్యాఖ్యలు సోషల్ మీడియాలో భారీ చర్చకు దారితీశాయి.
నిపుణుల ప్రకారం, అమెరికాలో పేటెంట్ హక్కులు, బీమా వ్యవస్థ, మార్కెట్ విధానాల కారణంగా బ్రాండెడ్ మందుల ధరలు భారీగా ఉంటాయి. మరోవైపు, ప్రపంచంలోనే అతిపెద్ద జెనరిక్ ఔషధాల తయారీ కేంద్రాల్లో భారత్ ఒకటి కావడంతో ఇక్కడ మందులు తక్కువ ధరకే అందుబాటులో ఉంటాయి.
అయితే, ఒకే మందుకు వేర్వేరు దేశాల్లో ధరలు మారడానికి పేటెంట్, ప్రభుత్వ విధానాలు, ఆరోగ్య బీమా, మార్కెట్ పరిస్థితులు వంటి అనేక అంశాలు కారణమని నిపుణులు చెబుతున్నారు. ప్రస్తుతం ఈ వైరల్ వీడియో ప్రపంచ ఆరోగ్య వ్యవస్థలో ఔషధాల ధరలపై కొత్త చర్చకు తెరలేపింది.
