లండన్లోని థేమ్స్ నది తీరంలో తొలిసారిగా గంగా హారతి నిర్వహించారు. వేలాది మంది ఈ చారిత్రాత్మక వేడుకకు హాజరై భారతీయ ఆధ్యాత్మికత, సంస్కృతికి అద్భుతమైన ప్రతీకగా నిలిచిన కార్యక్రమాన్ని వీక్షించారు.
ఆదివారం గ్రీన్విచ్లోని ఓల్డ్ రాయల్ నేవల్ కాలేజ్ వద్ద ఈ కార్యక్రమం జరిగింది. చిన్మయ మిషన్ 75వ వార్షికోత్సవ వేడుకల్లో భాగంగా చిన్మయ మిషన్ యూకే, టోటలీ థేమ్స్ ఉత్సవంతో కలిసి ఈ కార్యక్రమాన్ని నిర్వహించింది.సాయంత్రం వేళ థేమ్స్ నది తీరం మంత్రోచ్ఛారణలు, భక్తి గీతాలు, సంగీతం, ప్రార్థనలు, దీపాల వెలుగులతో ఆధ్యాత్మిక వాతావరణాన్ని సంతరించుకుంది. భారత్లోని వారాణసి, హరిద్వార్ ఘాట్లలో కనిపించే గంగా హారతి దృశ్యాలను తలపించేలా ఈ వేడుక సాగింది.
స్వామి స్వరూపానంద ఆధ్వర్యంలో హారతి నిర్వహించగా, బ్రిటన్లోని వివిధ హిందూ సంస్థలు, భారతీయ మరియు దక్షిణాసియా సమాజాలకు చెందిన పలువురు ఇందులో పాల్గొన్నారు. ఇతర వర్గాలకు చెందిన ప్రజలు కూడా ఈ కార్యక్రమాన్ని వీక్షించారు.ఈ వేడుక కేవలం ఆధ్యాత్మిక కార్యక్రమం మాత్రమే కాదని నిర్వాహకులు తెలిపారు. ప్రకృతి పట్ల కృతజ్ఞత, సంస్కృతి, ఐక్యత, సేవాభావం వంటి సందేశాలను ప్రపంచానికి అందించడమే దీని ఉద్దేశమని పేర్కొన్నారు. చిన్మయ మిషన్ దృష్టిలో గంగా జ్ఞానం, ఆధ్యాత్మికతకు ప్రతీకగా కూడా నిలుస్తుంది.
థేమ్స్ నది పరిరక్షణకు కూడా ప్రత్యేక ప్రాధాన్యం ఇచ్చారు. హారతి కార్యక్రమం మొత్తం నది ఒడ్డునే నిర్వహించారు. పూలు, దీపాలు లేదా ఎలాంటి పూజా సామగ్రినీ నదిలోకి వదలలేదు.
భారతదేశానికి వేల కిలోమీటర్ల దూరంలో జరిగిన ఈ వేడుక.. భారతీయ సంప్రదాయాలు సరిహద్దులను దాటి ప్రపంచవ్యాప్తంగా ఎలా విస్తరిస్తున్నాయో చూపించింది. థేమ్స్ తీరంలో వెలిగిన దీపాలు భారతీయ సంస్కృతి, ఆధ్యాత్మికతకు లండన్లో ఒక ప్రత్యేక గుర్తింపుగా నిలిచాయి.
