అమెరికాలోని లాస్ ఏంజెల్స్లో NBC4, టెలిముండో 52 కోసం వార్తా కవరేజీ అందిస్తున్న హెలికాప్టర్ కూలిపోయింది. మంగళవారం సాయంత్రం చాట్స్వర్త్ ప్రాంతంలో జరిగిన ఈ ప్రమాదంలో ముగ్గురు మృతి చెందగా, పలువురు గాయపడ్డారు.
న్యూస్చాపర్ 4గా పిలిచే ఈ హెలికాప్టర్ను ఏంజెల్ సిటీ ఎయిర్ నిర్వహిస్తోంది. సమీపంలో జరిగిన ఘోరమైన ఎస్యూవీ-బస్సు ప్రమాదాన్ని గాల్లో నుంచి చిత్రీకరిస్తుండగా, రాత్రి 7 గంటలకు కొద్దిసేపటి ముందు హెలికాప్టర్ అదుపు తప్పి కూలిపోయింది. హెలికాప్టర్లో ఉన్న NBC4, టెలిముండో 52 ఏరియల్ జర్నలిస్ట్ ఎలియానా మొరెనో, పైలట్ జార్జ్ మార్సినివ్ మృతి చెందినట్లు అధికారులు, NBC ధృవీకరించారు. నేలపై ఉన్న మరో వ్యక్తి కూడా ఈ ప్రమాదంలో ప్రాణాలు కోల్పోయారు.
హెలికాప్టర్ కూలిన వెంటనే అక్కడ మంటలు చెలరేగాయి. సమీపంలోని పలు వాహనాలు, నిల్వ కంటైనర్లు దెబ్బతిన్నాయి. 70 మందికి పైగా అగ్నిమాపక సిబ్బంది ఘటనాస్థలికి చేరుకుని మంటలను అదుపులోకి తీసుకొచ్చారు. గాయపడిన వారిని ఆసుపత్రికి తరలించారు. లైవ్ ప్రసారం మధ్యలోనే NBC4 యాంకర్లు తమ హెలికాప్టర్తో సంబంధాలు తెగిపోయినట్లు వెల్లడించారు. అనంతరం హెలికాప్టర్ కూలిపోయినట్లు నిర్ధారణ కావడంతో వీక్షకులకు విషాద వార్తను తెలిపారు.
ప్రమాదానికి ఖచ్చితమైన కారణం ఇంకా తెలియరాలేదు. అమెరికా జాతీయ రవాణా భద్రతా మండలి, ఫెడరల్ ఏవియేషన్ అడ్మినిస్ట్రేషన్ దర్యాప్తు ప్రారంభించనున్నాయి.
ఈ ప్రమాదానికి కొన్ని గంటల ముందు అదే ప్రాంతంలో ఎస్యూవీ ఒక నగర బస్సును ఢీకొట్టిన ఘటన జరిగింది. ఆ ప్రమాదంలో కనీసం ఇద్దరు మృతి చెందగా, మరో ఆరుగురు గాయపడ్డారు. ಅದే ఘటనను కవర్ చేస్తున్న సమయంలో NBC హెలికాప్టర్ ప్రమాదానికి గురైంది.
