కర్ణాటక రాజకీయాల్లో కీలక పరిణామం చోటుచేసుకుంది. రాష్ట్ర ఉప ముఖ్యమంత్రి డి.కె. శివకుమార్ను కాంగ్రెస్ శాసనసభా పక్షం (CLP) నాయకుడిగా ఏకగ్రీవంగా ఎన్నుకుంది. దీంతో ఆయన కర్ణాటక తదుపరి ముఖ్యమంత్రిగా బాధ్యతలు చేపట్టేందుకు మార్గం సుగమమైంది.
శనివారం జరిగిన సీఎల్పీ సమావేశంలో మాజీ ముఖ్యమంత్రి సిద్ధరామయ్య శివకుమార్ పేరును ప్రతిపాదించగా, హోంమంత్రి జి. పరమేశ్వర మద్దతు తెలిపారు. సమావేశానికి హాజరైన ఎమ్మెల్యేలు ఏకగ్రీవంగా ఆమోదం తెలపడంతో శివకుమార్ సీఎల్పీ నేతగా ఎన్నికయ్యారు.
ఇటీవల పార్టీ అధిష్ఠానం సూచన మేరకు సిద్ధరామయ్య ముఖ్యమంత్రి పదవికి రాజీనామా చేసిన సంగతి తెలిసిందే. ఆయన రాజీనామాను గవర్నర్ థావర్చంద్ గెహ్లాట్ ఆమోదించి మంత్రివర్గాన్ని రద్దు చేశారు. కొత్త ప్రభుత్వం ఏర్పడే వరకు కొనసాగాలని సిద్ధరామయ్యను కోరారు.
సీఎల్పీ సమావేశానికి హాజరయ్యేందుకు వచ్చిన డీకే శివకుమార్ విధానసౌధ మెట్లకు నమస్కరించడం ప్రత్యేక ఆకర్షణగా నిలిచింది. ఈ సందర్భంగా భారీ సంఖ్యలో అభిమానులు, కార్యకర్తలు ఆయనకు స్వాగతం పలికారు.
కొత్త ముఖ్యమంత్రి ప్రమాణస్వీకార కార్యక్రమం జూన్ 3న జరిగే అవకాశం ఉందని శివకుమార్ సంకేతాలు ఇచ్చారు. జ్యోతిష్కుడు ఆరాధ్య సూచన మేరకు జూన్ 3 సాయంత్రం 5:15 గంటలకు ప్రమాణస్వీకారం నిర్వహించాలనే ప్రతిపాదన కూడా చర్చనీయాంశమైంది.
కాంగ్రెస్లో ఎన్నాళ్లుగానో ఎదురుచూస్తున్న నాయకత్వ మార్పు ఇప్పుడు అధికారికంగా పూర్తికావడంతో, కర్ణాటక రాజకీయాల్లో కొత్త అధ్యాయం ప్రారంభం కానుంది.
