వాట్సాప్ ప్రవేశపెట్టాలని భావిస్తున్న కొత్త యూజర్నేమ్ ఫీచర్పై కేంద్ర ప్రభుత్వం ఆందోళన వ్యక్తం చేసింది. ఈ ఫీచర్ అమల్లోకి వస్తే సైబర్ నేరాలు, ఫిషింగ్ దాడులు, నకిలీ గుర్తింపులతో మోసాలు పెరిగే ప్రమాదం ఉందని ప్రభుత్వం భావిస్తోంది.
ప్రస్తుతం వాట్సాప్లో ఫోన్ నంబర్ ఆధారంగా వినియోగదారులను గుర్తిస్తారు. అయితే కొత్త ఫీచర్ ద్వారా యూజర్నేమ్లతో అకౌంట్లు ఉపయోగించే అవకాశం కల్పించనున్నారు. దీంతో ప్రభుత్వ శాఖలు, బ్యాంకులు, ప్రముఖ వ్యక్తుల పేర్లతో పోలిన యూజర్నేమ్లను సృష్టించి మోసాలకు పాల్పడే అవకాశం ఉందని అధికారులు హెచ్చరిస్తున్నారు.
ఇటీవలి కాలంలో దేశంలో పెరుగుతున్న 'డిజిటల్ అరెస్ట్' మోసాలను కూడా ప్రభుత్వం ప్రస్తావించింది. పోలీసులం, సీబీఐ, ఈడీ లేదా ఇతర ప్రభుత్వ సంస్థల అధికారులమంటూ సైబర్ నేరగాళ్లు ప్రజలను బెదిరించి డబ్బులు వసూలు చేస్తున్న ఘటనలు పెరుగుతున్నాయి. యూజర్నేమ్ ఫీచర్ అందుబాటులోకి వస్తే ఇలాంటి మోసాలు మరింత విశ్వసనీయంగా కనిపించే ప్రమాదం ఉందని అధికారులు అభిప్రాయపడుతున్నారు.
ఈ నేపథ్యంలో యూజర్నేమ్ల దుర్వినియోగాన్ని ఎలా అరికడతారు? నకిలీ ఖాతాలను ఎలా గుర్తిస్తారు? వినియోగదారుల భద్రత కోసం ఎలాంటి సెక్యూరిటీ వ్యవస్థలు అమలు చేస్తారు? అనే అంశాలపై మెటా నుంచి కేంద్ర ప్రభుత్వం వివరణ కోరింది.
ప్రభుత్వం లేవనెత్తిన సందేహాలకు సమాధానాలు వచ్చే వరకు భారత్లో ఈ ఫీచర్ను అమలు చేయవద్దని మెటాకు సూచించినట్లు సమాచారం. మరోవైపు, వినియోగదారుల భద్రతకు అత్యంత ప్రాధాన్యం ఇస్తున్నామని, ఫీచర్లో పలు రక్షణ వ్యవస్థలు ఉంటాయని మెటా తెలిపింది.
డిజిటల్ సేవలను మరింత సురక్షితంగా ఉంచే బాధ్యత టెక్నాలజీ సంస్థలపై ఉందని కేంద్ర ప్రభుత్వం స్పష్టం చేసింది. కొత్త ఫీచర్లు సైబర్ నేరాలకు అవకాశమివ్వకుండా తగిన జాగ్రత్తలు తీసుకోవాలని సూచించింది.
