హైదరాబాద్: బిఆర్ఎస్ మాజీ మంత్రి హరీష్ రావుకు ఫ్యూచరే తెలియదని మంత్రి పొంగులేటి శ్రీనివాస్ రెడ్డి చురకలంటించారు. తాము ఫ్యూచర్ సిటీ నిర్మిస్తుంటే హరీష్ రావుకు అసూయ అని అన్నారు. హరీష్ రావు వ్యాఖ్యలకు పొంగులేటి రీకౌంటర్ ఇచ్చారు. అమెరికా నుంచి ఫ్యూచర్ సిటీని ఆపేస్తామంటూ హరీష్ రావు మాట్లాడుతున్నారని మండిపడ్డారు. మాజీ సిఎం కెసిఆర్ కుటుంబం ఫాంహౌస్ లు కట్టుకున్నారని, తెలంగాణ భవిష్యత్తు కోసం ఫ్యూచర్ సిటీ కడుతున్నామని పొంగులేటి తెలియజేశారు. బిఆర్ఎస్ పార్టీ వాళ్లే ఆ పార్టీ భవిష్యత్తు ఖతం చేయాలని చూస్తున్నారని, ఫ్యూచర్ సిటీ భూములపై అక్కడ ఎవరికైనా ఒప్పందాలు చేశారా? అని ప్రశ్నించారు. ముందు హరీష్ రావు ఫ్యూచర్ కాపాడుకోవాలని, బిఆర్ఎస్ కు ఫ్యూచర్ లేదని, ఫ్యూచర్ సిటీకి తిరుగులేదు పొంగులేటి శ్రీనివాస్ రెడ్డి పేర్కొన్నారు.
