నగరంలో ఆర్టీసీ డ్రైవర్ ఆత్మహత్యకు ప్రయత్నించారు. జి.లింగారెడ్డి అనే వ్యక్తి భద్రాచలం డిపోలో ఆర్టీసి డ్రైవర్ (స్టాప్ నెం: 825862) గా పనిచేస్తూ ఖమ్మం రూరల్ మండలం నాయుడుపేట ఆర్టీసీ కాలనీలో నివాసం ఉంటున్నారు. రెండు రోజులుగా ఆర్టీసీ సమ్మె కావడంతో ఇంట్లోనే ఉంటున్నారు. అయితే గతేడాది నుంచి కుటుంబానికి సంబంధించిన విషయాలపై భార్యాభర్తల మధ్య వివాదం కొనసాగుతుంది. ఈ నేపథ్యంలోనే గురువారం గడ్డిమందు సేవించడంతో హుటాహుటిన రేవతి సెంటర్ సమీపంలోని ఒక ప్రైవేట్ ఆసుపత్రికి తరలించారు. ప్రస్తుతం అతని పరిస్థితి విషమంగా ఉందని డాక్టర్లు చెప్తున్నారు. కుటుంబ విషయాలపైనే ఆత్మహత్యకు పాల్పడ్డారని డ్రైవర్ భార్య, పోలీసులు చెప్తున్నారు. టూటౌన్ పోలీసులు కేసు నమోదు చేసుకొని దర్యాప్తు చేస్తున్నారు.
