న్యూఢిల్లీ: కాక్రోచ్ జనతా పార్టీ (సీజేపీ) నిర్వహించిన ‘సంసద్ చలో’ ర్యాలీలో నిరసనకారులపై పోలీసులు వ్యవహరించిన తీరును నిరసిస్తూ తన నిరవధిక నిరాహార దీక్షను కొనసాగిస్తున్నట్లు సామాజిక కార్యకర్త సోనం వాంగ్చుక్ ప్రకటించారు. విద్యార్థి నేతలకు పార్లమెంట్ సభ్యులను కలిసే అవకాశం కల్పించే వరకు లేదా తాను ఆసుపత్రిలో ఉండగానే వారిని కలిసేందుకు అనుమతి ఇచ్చే వరకు దీక్ష విరమించబోనని స్పష్టం చేశారు. సఫ్దర్జంగ్ ఆసుపత్రి నుంచి సోమవారం విడుదల చేసిన చేతిరాత ప్రకటనలో వాంగ్చుక్ ఈ విషయాన్ని వెల్లడించారు.
శాంతియుతంగా నిరసన వ్యక్తం చేస్తున్న యువతపై పోలీసులు కఠినంగా వ్యవహరిస్తున్న దృశ్యాలను చూసిన తర్వాత తన దీక్షను కొనసాగించాలని నిర్ణయించుకున్నట్లు పేర్కొన్నారు. పార్లమెంట్ భవనంలో విద్యార్థి నాయకులకు ప్రజాప్రతినిధులను కలిసే అవకాశం కల్పించాలని, అది సాధ్యం కాకపోతే ఆసుపత్రిలో తన వద్దకే వారిని అనుమతించాలని వాంగ్చుక్ కోరారు. అప్పటిలోగా కేంద్ర ప్రభుత్వం విద్యాశాఖ మంత్రి బాధ్యతపై కూడా నిర్ణయం తీసుకుంటుందని ఆశిస్తున్నట్లు తెలిపారు.
ప్రభుత్వం, పోలీసుల ప్రేరేపించే చర్యలు ఎదురైనా యువత శాంతియుతంగా వ్యవహరించిన తీరు తనను ఎంతో కదిలించిందని వాంగ్చుక్ అన్నారు. విద్యార్థులు తమ సమస్యలను ఈ రోజు లేదా రేపు పార్లమెంట్ ముందు వినిపించే అవకాశం కల్పిస్తే సమస్య పరిష్కారమవుతుందని ఆయన అభిప్రాయపడ్డారు. ఇప్పటివరకు శాంతిని పాటించినట్లుగానే యువత ఇకపై కూడా ప్రశాంతంగా వ్యవహరిస్తుందనే నమ్మకం వ్యక్తం చేశారు.
ఇదిలా ఉండగా, భారీ వర్షం కురుస్తున్నప్పటికీ వేలాది మంది నిరసనకారులు జంతర్మంతర్ వద్దకు చేరుకున్నారు. పార్లమెంట్ వైపు సీజేపీ చేపట్టిన ‘సంసద్ చలో’ ర్యాలీని ఢిల్లీ పోలీసులు అడ్డుకున్నారు. జంతర్మంతర్ పరిసర ప్రాంతాల్లో బారికేడ్లు ఏర్పాటు చేసి రహదారులను మూసివేయడంతో పాటు పలువురు నిరసనకారులను అదుపులోకి తీసుకున్నారు.
