నేపాల్లో సంభవించిన భారీ ఆకస్మిక వరదలు యాత్రికులు, పర్యాటకుల కుటుంబాల్లో తీవ్ర ఆందోళన కలిగిస్తున్నాయి. ఈ నేపథ్యంలో హైదరాబాద్లోని ఎల్బీనగర్ వాస్తునగర్కు చెందిన సుహాసిని రెడ్డి ఆచూకీ తెలియకపోవడంతో ఆమె కుటుంబ సభ్యులు ఆందోళన వ్యక్తం చేస్తున్నారు.
సుహాసిని ఆస్ట్రేలియాలో సాఫ్ట్వేర్ ఇంజినీర్గా పనిచేస్తున్నారు. ఆగస్టు 19న కైలాస్ మానస సరోవర్ యాత్ర కోసం ఆమె ప్రయాణం ప్రారంభించినట్లు సమాచారం.
గృహప్రవేశం కోసం హైదరాబాద్కు వచ్చిన సుహాసిని
కుటుంబ సభ్యుల ప్రకారం.. సుహాసిని ఇటీవల హైదరాబాద్కు వచ్చారు. కుటుంబంలో జరిగిన గృహప్రవేశ కార్యక్రమంలో పాల్గొన్న అనంతరం నేపాల్ మీదుగా మానస సరోవర్ యాత్రకు బయలుదేరారు.
హైదరాబాద్ నుంచి ఢిల్లీకి, అక్కడి నుంచి ఖాట్మాండు చేరుకున్నారు. ఖాట్మాండులో ఆస్ట్రేలియాలో నివసిస్తున్న మరో స్నేహితురాలిని కూడా కలుసుకున్నట్లు కుటుంబ సభ్యులు తెలిపారు.
ఆ తర్వాత ఫోన్కి స్పందన లేదు
సుహాసిని కుటుంబంతో చివరిసారిగా మాట్లాడిన సమయంలో ఖాట్మాండు నుంచి మానస సరోవర్ వైపు ప్రయాణిస్తున్నట్లు తెలిపినట్లు ఆమె సోదరుడు లోహిత్ కుమార్ వెల్లడించారు. ఆ తర్వాత ఆమెతో కుటుంబానికి సంబంధాలు తెగిపోయాయి.
భారీ వరదలు, రహదారులు దెబ్బతినడం, కమ్యూనికేషన్ వ్యవస్థలకు అంతరాయం ఏర్పడటంతో ఆమె ప్రస్తుత పరిస్థితి, ఆచూకీపై కుటుంబానికి సమాచారం అందలేదు.
నేపాల్లో భారీ వరదల బీభత్సం
ఆగస్టు 26న నేపాల్లోని రసువా ప్రాంతంలో భారీ వరదలు, మట్టి-రాళ్ల ప్రవాహం సంభవించాయి. నేపాల్-టిబెట్ సరిహద్దు ప్రాంతంలోని రహదారులు, వంతెనలు, భవనాలు తీవ్రంగా దెబ్బతిన్నాయి.
ఈ ప్రాంతం కైలాస్ మానస సరోవర్ యాత్రకు వెళ్లే యాత్రికులకు కీలకమైన మార్గం. ఈ విపత్తు కారణంగా పలువురు భారతీయులు సహా వందలాది మంది ఆచూకీ తెలియకుండా పోయారు.
288 మంది భారతీయులు ఇంకా సంప్రదింపులకు దూరంగా
భారత విదేశాంగ మంత్రిత్వ శాఖ ప్రకారం.. నేపాల్లో వరద ప్రభావిత ప్రాంతాల్లో 288 మంది భారతీయులు ఇంకా సంప్రదింపులకు అందుబాటులో లేరు. మరోవైపు టిబెట్ వైపు సుమారు 200 మంది భారతీయులు తరలింపు సహాయం కోరినట్లు అధికారులు తెలిపారు.
ఇప్పటికే నేపాల్ వైపు చిక్కుకున్న 21 మంది భారతీయులను రక్షించినట్లు కేంద్ర ప్రభుత్వం వెల్లడించింది.
ప్రభుత్వ సహాయం కోరుతున్న కుటుంబం
సుహాసిని సురక్షితంగా ఉన్నారా? ఎక్కడ ఉన్నారు? అనే విషయంపై సమాచారం అందించాలని ఆమె కుటుంబ సభ్యులు భారత ప్రభుత్వాన్ని కోరుతున్నారు.
నేపాల్లో చిక్కుకున్న తెలంగాణ ప్రజలకు సహాయం చేసేందుకు తెలంగాణ ప్రభుత్వం న్యూఢిల్లీలోని తెలంగాణ భవన్లో ప్రత్యేక హెల్ప్లైన్, కోఆర్డినేషన్ సెంటర్ ఏర్పాటు చేసింది. హైదరాబాద్లోని తెలంగాణ సచివాలయంలో కూడా ప్రత్యేక కంట్రోల్ రూమ్ ఏర్పాటు చేశారు.
కుటుంబంలో తీవ్ర ఆందోళన
సుహాసినికి ట్రెక్కింగ్, సాహస యాత్రలంటే ఎంతో ఇష్టమని కుటుంబ సభ్యులు తెలిపారు. ప్రస్తుతం నేపాల్లో నెలకొన్న పరిస్థితుల నేపథ్యంలో ఆమె సురక్షితంగా తిరిగి రావాలని కుటుంబ సభ్యులు ఆశిస్తున్నారు.
భారత అధికారులు నేపాల్ ప్రభుత్వం, భారత రాయబార కార్యాలయం, స్థానిక అధికారులు, టూర్ ఆపరేటర్లతో సమన్వయం చేస్తూ గల్లంతైన భారతీయుల వివరాలను సేకరిస్తున్నారు.
