అమెరికాలోని టెక్సాస్ రాష్ట్రం అలెన్ (Allen) నగరంలోని రాధా కృష్ణ టెంపుల్లో నిర్వహించిన శ్రీ వెంకటేశ్వర స్వామి విగ్రహ ప్రాణ ప్రతిష్ఠా మహోత్సవం అంగరంగ వైభవంగా జరిగింది. పలువురు వేద పండితుల ఆధ్వర్యంలో వేదమంత్రోచ్చారణల మధ్య హోమాలు, యాగాలు, ప్రత్యేక పూజలు, కలశాభిషేకాలు నిర్వహించి, శ్రీ వెంకటేశ్వర స్వామి విగ్రహాన్ని వైదిక సంప్రదాయాల ప్రకారం ప్రతిష్ఠించారు. అమెరికాలోని వివిధ రాష్ట్రాల నుంచి వేలాది మంది భక్తులు ఈ మహోత్సవానికి హాజరై స్వామివారి ఆశీస్సులు పొందారు.
ఈ మహోత్సవంలో అత్యంత విశేష ఆకర్షణగా నిలిచింది శ్రీవారి పవిత్ర లడ్డూ వేలం. ఈ లడ్డూ కోసం భక్తులు పోటాపోటీగా బిడ్లు వేయగా, చివరకు 7,77,777 అమెరికన్ డాలర్లు (సుమారు రూ.7.4 కోట్లు) అత్యధిక ధర పలికింది. ఈ చారిత్రాత్మక బిడ్ను శ్రీ వెంకట రమణ అనే భక్తుడు దక్కించుకున్నారు.
వేలం ముగిసిన వెంటనే ఆలయ ప్రాంగణం అంతా "గోవిందా... గోవిందా..." నామస్మరణతో మార్మోగిపోయింది. విదేశీ నేలపై శ్రీవారి భక్తి వైభవాన్ని చాటిచెప్పిన ఈ ఘట్టం అమెరికా తెలుగు, భారతీయ సమాజంలో ప్రత్యేక చర్చనీయాంశంగా మారింది.
ఈ ప్రాణ ప్రతిష్ఠా మహోత్సవం, లడ్డూ వేలం ద్వారా సేకరించిన నిధులు ఆలయ అభివృద్ధి, ధార్మిక సేవా కార్యక్రమాలు, సనాతన ధర్మ ప్రచారం కోసం వినియోగించనున్నట్లు ఆలయ నిర్వాహకులు తెలిపారు.
