తమిళనాడు రాజకీయ ముఖచిత్రం దశాబ్దాలుగా ద్రవిడ సిద్ధాంతం, సామాజిక న్యాయం, ప్రాంతీయ అస్తిత్వం చుట్టూ తిరుగుతోంది. డిఎంకె, అన్నాడిఎంకె పార్టీలు ఈ పునాదులపైనే పటిష్టమైన ఓటు బ్యాంకును నిర్మించుకున్నాయి. అయితే, ఇటీవల కాలంలో విజయ్ నేతృత్వంలోని తమిళగ వెట్రి కళగం వంటి కొత్తశక్తులు ఈ వ్యవస్థను సవాలు చేయడం ఒక చారిత్రక పరిణామంగా కనిపిస్తోంది. దీనిని కేవలం ఒక సినీ నటుడి రాజకీయ ప్రవేశంగా చూడటం కంటే, మారుతున్న తమిళ సమాజ ఆకాంక్షలకు ప్రతిబింబంగా అర్థం చేసుకోవాలి. ద్రవిడ పార్టీలు దశాబ్దాలుగా సామాజిక న్యాయాన్ని తమ ప్రధాన ఎజెండాగా మార్చుకున్నాయి. రిజర్వేషన్లు, అణగారిన వర్గాల సాధికారత, హిందీ వ్యతిరేక ఉద్యమాలద్వారా అవి ప్రజల్లో బలంగా నాటుకుపోయాయి. కానీ, ఏ పార్టీ అయినా సుదీర్ఘకాలం అధికారంలో ఉన్నప్పుడు సహజంగానే కొంత ప్రభుత్వ వ్యతిరేకత ఎదురవుతుంది. అవినీతి ఆరోపణలు, వారసత్వ రాజకీయాలు, క్షేత్రస్థాయిలో కేడర్ పెత్తనం వంటి అంశాలు సామాన్యులలో అసహనాన్ని కలిగించవచ్చు. విజయ్ తన టివికె పార్టీ ద్వారా ఈ అసంతృప్తినే పెట్టుబడిగా మార్చుకునే ప్రయత్నం చేశారు. ఆయన తన సిద్ధాంతాల్లో ద్రవిడ వాదాన్ని, జాతీయవాదాన్ని మేళవించి ఒక కొత్త ‘తమిళ జాతీయవాదాన్ని’ తెరపైకి తెచ్చారు. ఇది పాత ద్రవిడ పార్టీల మూస పద్ధతులకు భిన్నంగా యువతను ఆకర్షించింది.
తమిళనాడు రాజకీయాల్లో సినిమాకు, రాజకీయాలకు విడదీయలేని అనుబంధం ఉంది. ఎంజిఆర్, కరుణానిధి, జయలలిత వంటి వారు వెండితెరపై సంపాదించుకున్న ఆరాధనను ఓట్లుగా మార్చుకోవడంలో సఫలమయ్యారు. విజయ్ ప్రస్తుత తరం యువతలో అపారమైన ఫాలోయింగ్ కలిగిన నటుడు. ముఖ్యంగా మొదటిసారి ఓటు వేసే యువత పాత కాలపు సిద్ధాంతాల కంటే, సమకాలీన సమస్యల పరిష్కారం, నూతన నాయకత్వం కోసం పరితపిస్తున్నారు. డిఎంకె, అన్నాడిఎంకె పార్టీల మధ్య సాగుతున్న దశాబ్దాల పోరాటంతో విసిగిపోయిన ఓటర్లకు టివికె ఒక ప్రత్యామ్నాయంగా కనిపించింది. సామాజిక న్యాయం విషయంలో ద్రవిడ పార్టీల నిబద్ధతను ఎవరూ శంకించలేరు, కానీ ఆ న్యాయం ఫలాలు క్షేత్రస్థాయిలో అందరికీ సమానంగా అందుతున్నాయా అనే ప్రశ్న తలెత్తుతోంది. కొత్త తరం ఓటర్లు కేవలం సంక్షేమ పథకాలపైనే కాకుండా, ఉపాధి అవకాశాలు, పారదర్శక పాలన, ఆధునిక మౌలిక సదుపాయాలపై దృష్టి సారిస్తున్నారు. విజయ్ తన ప్రసంగాల్లో ‘సెక్యులర్ సోషల్ జస్టిస్’ గురించి మాట్లాడుతూనే, ప్రస్తుత పాలకుల వైఫల్యాలను ఎత్తిచూపడం ద్వారా తటస్థ ఓటర్లను తనవైపు తిప్పుకున్నారు.
వారసత్వ రాజకీయాలకు మించిన నాయకత్వ పటిమ ఆ పార్టీలకు అవసరం. టివికె విజయంలో యువత పాత్ర కీలకం. వారసత్వ రాజకీయాల నీడలో పెరిగే పార్టీలకు కొత్త రక్తం, కొత్త ఆలోచనలు దూరమవుతాయి. విజయ్ వంటి కొత్త నాయకుడు ఎటువంటి రాజకీయ నేపథ్యం లేకుండా, కేవలం ప్రజలతో తనకున్న అనుబంధం, యువత ఆకాంక్షలను ప్రతిబింబించే గొంతుకగా మారడంవల్ల పాత కోటలు బద్దలయ్యాయి. ఇతర రాష్ట్రాల్లోని ప్రాంతీయ పార్టీలు కూడా తమ కేడర్లో కిందిస్థాయి నాయకత్వాన్ని ప్రోత్సహించకపోతే, అకస్మాత్తుగా వచ్చే కొత్త శక్తుల ముందు నిలబడలేవని అర్థం చేసుకోవాలి. డిజిటల్ విప్లవం, సంప్రదాయేతర ప్రచారంలో ముందుండాలి. టివికె పార్టీ సంప్రదాయ మీడియా కంటే సోషల్ మీడియాను, ముఖ్యంగా యువత ఎక్కువగా ఉండే ప్లాట్ ఫారమ్లను అద్భుతంగా వాడుకుంది. క్లిష్టమైన సిద్ధాంతాలను సామాన్యుడికి అర్థమయ్యేలా చిన్న చిన్న వీడియోలు, రీల్స్ ద్వారా చేరువ చేయడం నేటి రాజకీయాల్లో అనివార్యం. కేవలం బహిరంగ సభలు, భారీ ర్యాలీలపైనే ఆధారపడే పాత పార్టీలు, డిజిటల్ యుగంలో ఓటరు నాడిని పట్టుకోవడంలో వెనుకబడిపోతున్నాయి. ఓటరుతో నేరుగా, నిరంతరం సంబంధం కలిగి ఉండే సాంకేతికతను అందిపుచ్చుకోవడం అత్యవసరం.
ప్రభుత్వ వ్యతిరేకతను తక్కువ అంచనా వేయకపోవడం, ఏ ప్రాంతీయ పార్టీ అయినా తమ ఓటు బ్యాంకు సురక్షితంగా ఉందని భావించడం ప్రమాదకరం. తమిళనాడులో డిఎంకె, అన్నాడిఎంకెలు రెండూ బలంగా ఉన్నప్పటికీ, ప్రజలు ఒక ‘మూడవ శక్తి’ కోసం ఎంతగా పరితపించారో టివికె సీట్ల సంఖ్య నిరూపించింది. సామాజిక న్యాయం కోసం పనిచేస్తున్నామని చెప్పుకునే పార్టీలు, అధికార గర్వంతో ప్రజలకు దూరం కాకుండా, నిరంతరం ఆత్మవిమర్శ చేసుకోవాలి. ప్రాంతీయ అస్తిత్వం, ఆధునికతను జోడించడం అవసరం. విజయ్ తన ప్రసంగాల్లో తమిళ భాష, సంస్కృతి గురించి మాట్లాడుతూనే, గ్లోబల్ విజన్ను కూడా ప్రదర్శించారు. ప్రాంతీయ పార్టీలు తమ మూలాలను వదలకుండానే, ఆధునిక ప్రపంచానికి తగ్గట్టుగా మారాలి. కేవలం భావోద్వేగపూరితమైన నినాదాలు ఒకప్పటిలా ఓట్లు రాల్చవు; వాటికి ఆచరణాత్మకమైన పరిష్కారాలు కూడా తోడవ్వాలి. టివికె విజయం అనేది దేశంలోని అన్ని ప్రాంతీయ పార్టీలకు ఒక హెచ్చరిక, ఒక అవకాశం.
పాత పద్ధతులను వీడి, ప్రజల నిజమైన ఆకాంక్షలను ప్రతిబింబించేలా మారినప్పుడే ప్రాంతీయ పార్టీలు తమ ఉనికిని కాపాడుకోగలవు. తమిళనాడులో టివికె విజయం దేశంలోని ప్రాంతీయ పార్టీలకు ఒక శక్తివంతమైన మేల్కొలుపు. దశాబ్దాల చరిత్ర కలిగిన డిఎంకె, అన్నాడిఎంకె వంటి పార్టీలైనా, సిద్ధాంతాలైన కాలానికి అనుగుణంగా మార్చుకోకపోతే ప్రజలు ప్రత్యామ్నాయాల వైపు చూస్తారని ఈ పరిణామం నిరూపించింది. వారసత్వ రాజకీయాలు, అవినీతికి స్వస్తి పలికి, యువత ఆకాంక్షలకు అద్దంపట్టే ఆధునిక రాజకీయ శైలిని అవలంబించడమే ప్రాంతీయ శక్తుల మనుగడకు ఏకైక మార్గం. కేవలం పాత విజయాలను నెమరువేసుకోకుండా, పారదర్శకమైన పాలనను, నూతన నాయకత్వాన్ని అందించినప్పుడే జాతీయ పార్టీల ధాటిని తట్టుకొని ప్రాంతీయ అస్తిత్వాన్ని కాపాడుకోగలమని టివికె ప్రభంజనం స్పష్టం చేస్తోంది. మార్పును ఆహ్వానించే శక్తులే భవిష్యత్తు రాజకీయాల్లో విజేతలుగా నిలుస్తాయి.
