డబ్భయ్కిపైగా దేశాలు పాల్గొన్న గ్లాస్గో కామన్వెల్త్ క్రీడల్లో పదమూడు స్వర్ణాలు, పదిహేడు రజతాలు, తొమ్మిది కాంస్య పతకాలతో భారతదేశం నాలుగో స్థానంలో నిలబడటం గర్వించదగిన విషయం. నాలుగేళ్ల క్రితం బర్మింగ్ హామ్లో జరిగిన కామన్వెల్త్ క్రీడలతో పోలిస్తే ఈసారి పతకాలు తగ్గాయి. అప్పుడు 61 పతకాలను గెలుచుకుంటే ఇప్పుడు మనం సాధించినవి 39 మాత్రమే. అంతమాత్రాన మన క్రీడాకారులను తక్కువ అంచనా వేయలేం. ఎందుకంటే, నిరుడు కామన్వెల్త్ క్రీడల్లో 21 క్రీడాంశాలలో పోటీలు జరిగితే, ఈసారి వ్యయభారాన్ని తగ్గించుకునేందుకు కేవలం పది అంశాలలోనే పోటీలు నిర్వహించారన్న విషయాన్ని గుర్తుంచుకోవాలి. సాధారణంగా భారత్కు పతకాల పంట పండించే హాకీ, బ్యాడ్మింటన్, రెజ్లింగ్, టేబుల్ టెన్నిస్, షూటింగ్ వంటి క్రీడలు ఈసారి లేవు. అయినా నాలుగో స్థానాన్ని నిలబెట్టుకోవడం మన క్రీడాకారులు సాధించిన ఘన విజయంగానే చెప్పుకోవాలి.
ఈసారి భారత బాక్సర్లు ప్రదర్శించిన ప్రతిభాపాటవాల గురించి ఎంత చెప్పినా తక్కువే. ఏడు స్వర్ణాలు సహా మొత్తం పది పతకాలను సాధించి, మన బాక్సింగ్ యోధులు సత్తాచాటారు. జూడోలోనూ రెండు స్వర్ణాలు గెలుచుకోవడం విశేషం. అథ్లెటిక్స్ లోనూ మనవాళ్లు నిలకడగా రాణించారు. గతంలో వెయిట్ లిఫ్టింగ్, రెజ్లింగ్ వంటి కొన్ని క్రీడలకు మాత్రమే పరిమితమైన భారత క్రీడాకారుల ప్రతిభ ఈసారి పలు క్రీడాంశాలకు విస్తరించింది. నిన్నమొన్నటి వరకూ అథ్లెటిక్స్, వెయిట్ లిఫ్టింగ్ వంటి క్రీడలలోనే సత్తాచాటుతూ వచ్చిన భారత మహిళలు ఈసారి బాక్సింగ్, జూడోలోనూ పతకాలు కొల్లగొట్టారు. పారా అథ్లెటిక్స్ లోనూ మన క్రీడాకారులు శారీరక పరిమితులను సంకల్ప బలంతో అధిగమించి, త్రివర్ణ పతాకాన్ని రెపరెపలాడించారు.
ఈసారి ఈ విభాగంలో మూడు స్వర్ణాలు, రెండు రజతాలు, రెండు కాంస్యాలతో ఏడు పతకాలను భారత్ తన ఖాతాలో వేసుకుంది. వీటిలో మహిళలు రెండు పతకాలు సాధించడం గర్వకారణం. పారా క్రీడలకు మరిన్ని నిధులు, శాస్త్రీయ శిక్షణ, ఆధునిక పరికరాలు అందిస్తే భారత క్రీడాకారులు అంతర్జాతీయ క్రీడావేదికలపైనా సత్తా చాటగలరనడానికి తాజాగా ముగిసిన కామన్వెల్త్ క్రీడలను ఉదాహరణగా చెప్పుకోవచ్చు. అయితే కామన్వెల్త్ క్రీడల్లో సాధించిన విజయాలకు అతిగా సంబరపడాల్సిన అవసరం లేదు. ఈ క్రీడలు ప్రపంచ క్రీడా సామర్థ్యానికి పూర్తి కొలమానం కావు. ఇవి కామన్వెల్త్ దేశాల మధ్య జరిగే పరిమిత పోటీలు మాత్రమే. అమెరికా, చైనా, జపాన్, ఫ్రాన్స్, జర్మనీ వంటి క్రీడల్లో దిగ్గజాలనదగిన దేశాలు ఇందులో పాల్గొనవు. కాబట్టి కామన్వెల్త్ గేమ్స్లో పతకాలు గెలవడం గొప్ప విషయమే అయినప్పటికీ, ఈ విజయంతో ప్రపంచ క్రీడలపై ఆధిపత్యం సాధించామని భావిస్తే అంతకంటే హాస్యాస్పదమైన విషయం మరొకటి ఉండదు. ఒలింపిక్స్, ప్రపంచ చాంపియన్షిప్స్ వంటి అంతర్జాతీయ క్రీడావేదికలపై సత్తాచాటితేనే మనమంటే ఏమిటో పదుగురికీ తెలిసేది. అలా చూసినప్పుడు, అంతర్జాతీయ స్థాయిలో కాకపోయినా, త్వరలో జపాన్లో జరగబోయే ఆసియా క్రీడలు మన క్రీడాకారుల ప్రతిభకు గీటురాయిగా భావించవచ్చు.
ఆసియాడ్లో భారత క్రీడాకారులకు ఎదురయ్యే పోటీ కామన్వెల్త్ కంటే కొన్ని రెట్లు అధికంగా ఉంటుంది. చైనా, జపాన్, దక్షిణ కొరియా వంటి అగ్రశ్రేణి జట్లతో పోటీపడి సత్తా నిరూపించుకోవలసి ఉంటుంది. గ్లాస్గోలో ఇచ్చిన విజయాల స్ఫూర్తి, ఆత్మవిశ్వాసంతో మన క్రీడాకారులు బరిలోకి దిగి సామర్థ్యాన్ని చాటుకోవాలి. ఇక్కడ సాధించిన విజయాలే ఒలింపిక్స్కు బలమైన పునాది వేస్తాయనడంలో సందేహం లేదు. క్రీడల్లో విజయాలు ఒక్కరోజులో రావు.
దీర్ఘకాలిక ప్రణాళిక, సమర్థులైన కోచ్ల నేతృత్వంలో సాగే శిక్షణ, పటిష్టమైన క్రీడా విధానం వంటివి అందుకు దోహదపడతాయి. కామన్వెల్త్ క్రీడల్లో లభించిన విజయాలు భారత క్రీడలకు మంచి ఊపునిచ్చాయన్నది వాస్తవం. కానీ ఆ ఉత్సాహాన్ని ఆత్మసంతృప్తిగా మార్చుకుంటే ప్రయోజనం లేదు. ప్రపంచ క్రీడాశక్తిగా ఎదగాలంటే ప్రతి విజయాన్ని మరో పెద్ద లక్ష్యానికి మెట్టుగా మలుచుకోవాలి. గ్లాస్గోలో సాధించిన పతకాలు చరిత్రలో నిలవాలంటే, జపాన్లో జరగబోయే ఆసియా క్రీడల్లోనూ, ఆ తర్వాత ఒలింపిక్స్ లోనూ భారత త్రివర్ణ పతాకం మరింత ఎత్తులో ఎగరాలి. అదే భారత క్రీడలకు నిజమైన విజయం.
