2025-26 సంవత్సరానికి కేంద్ర ప్రభుత్వం విడుదల చేసిన అంచనాల ప్రకారం గుడ్ల ఉత్పత్తిలో ఆంధ్రప్రదేశ్ దేశంలో మొదటి స్థానాన్ని, మాంసం ఉత్పత్తిలో నాలుగో స్థానాన్ని, పాల ఉత్పత్తిలో ఏడో స్థానాన్ని సాధించింది. రాష్ట్రంలోని కూటమి ప్రభుత్వ పాలనలో గత రెండేళ్లలో పశుసంవర్ధక శాఖ విశేష విజయాలను నమోదు చేసిందని అధికారులు తెలిపారు.
రాష్ట్ర స్థూల ఆర్థికోత్పత్తి (జీఎస్డీపీ)లో పశుసంవర్ధక రంగం 12.17 శాతం వాటాను అందిస్తూ రాష్ట్ర ఆర్థిక వ్యవస్థకు కీలక బలంగా నిలిచింది. ప్రపంచ ప్రఖ్యాత ఒంగోలు, పుంగనూరు పశువుల జాతులు, నెల్లూరు, మాచర్ల గొర్రెల జాతులు, అసీల్ కోళ్ల జాతి రాష్ట్రానికి ప్రత్యేక గుర్తింపును తెచ్చిపెడుతున్నాయి.
గత రెండేళ్లలో పశుసంవర్ధక శాఖ ఉచిత డీవార్మింగ్ కార్యక్రమం నిర్వహించడంతో పాటు 26,512 పశువైద్య ఆరోగ్య శిబిరాలు ఏర్పాటు చేసి సుమారు 23 లక్షల పశువులకు వైద్య సేవలు అందించింది. మహాత్మా గాంధీ జాతీయ ఉపాధి హామీ పథకంతో అనుసంధానం చేసి పేద రైతుల కోసం సబ్సిడీపై 30,313 పశుగృహాల నిర్మాణాన్ని చేపట్టింది.
ప్రకృతి వైపరీత్యాల సమయంలో పశువుల మరణాలకు చెల్లించే పరిహారాన్ని ఒక్కో పశువుకు ₹37,500 నుంచి ₹50,000కు పెంచింది. పశుగ్రాసం, మేత విత్తనాలు, చాఫ్ కట్టర్లు పంపిణీ చేయడంతో పాటు మొబైల్ వెటర్నరీ అంబులెన్స్ సేవలు, పశువుల బీమా పథకం అమలు చేసింది. రూ.300 విలువైన సెక్స్-సార్టెడ్ వీర్యం స్ట్రాలను రూ.150కే రైతులకు అందించగా, ఎంబ్రియో ట్రాన్స్ఫర్ సాంకేతికత ద్వారా 67 అధిక జన్యు సామర్థ్యం కలిగిన దూడలను ఉత్పత్తి చేసింది.
2026-27 సంవత్సరానికి పశుసంవర్ధక శాఖ పలు ప్రతిష్ఠాత్మక కార్యక్రమాలను ప్రతిపాదించింది. రూ.15 కోట్ల సబ్సిడీతో 10 లక్షల సెక్స్-సార్టెడ్ వీర్యం డోసులను వినియోగించడం, ప్రత్యేక పౌల్ట్రీ పాలసీ ప్రవేశపెట్టడం, ఖాళీగా ఉన్న వెటర్నరీ అసిస్టెంట్ సర్జన్ పోస్టులను భర్తీ చేయడం, 777 కొత్త పశువైద్య ఆసుపత్రి భవనాల నిర్మాణాన్ని ప్రారంభించడం వంటి కార్యక్రమాలు చేపట్టనుంది. ఈ చర్యల ద్వారా పశుసంవర్ధక రంగంలో 15 శాతం వృద్ధి సాధించి, 2029-30 నాటికి రాష్ట్రం లక్ష్యంగా పెట్టుకున్న ₹3 లక్షల కోట్ల జీఎస్డీపీ సాధనకు తోడ్పడాలని ప్రభుత్వం లక్ష్యంగా పెట్టుకుంది.
