ఆంధ్రప్రదేశ్‌లో విద్యుత్ మౌలిక సదుపాయాల అభివృద్ధికి మరో కీలక అడుగు పడింది. ఏపీ ట్రాన్స్‌కో జూన్ నుంచి డిసెంబర్ 2026 మధ్య ₹3,507 కోట్ల వ్యయంతో 24 ప్రధాన ట్రాన్స్‌మిషన్ ప్రాజెక్టులను పూర్తి చేసి ప్రజలకు అంకితం చేయనుంది. విజయవాడలోని విద్యుత్ సౌధలో నిర్వహించిన సమీక్ష సమావేశంలో ప్రత్యేక ప్రధాన కార్యదర్శి కె. విజయానంద్ అధికారులకు పనులను వేగవంతం చేయాలని ఆదేశించారు. ఇప్పటికే 3 భారీ 400 కేవీ, 8 220 కేవీ, 21 132 కేవీ సబ్‌స్టేషన్లు ప్రారంభించి రాష్ట్ర గ్రిడ్‌కు 1,465 ఎంవీఏ సామర్థ్యం, 571 సర్క్యూట్ కిలోమీటర్ల లైన్లు జోడించినట్లు తెలిపారు. ప్రస్తుతం ₹5,279 కోట్ల విలువైన 68 ప్రాజెక్టులు అమలులో ఉండగా, మరో 29 కొత్త ప్రాజెక్టులకు టెండర్లు పిలిచారు. ఈ ప్రాజెక్టులు పూర్తైతే విద్యుత్ సరఫరా మరింత విశ్వసనీయంగా మారి పరిశ్రమలు, వ్యవసాయం, గృహ వినియోగదారులకు ప్రయోజనం చేకూరనుంది.