చరణ్ బాబు పోషించిన ఆధి, భరత్ శ్రీనివాసన్ నటించిన సీఐ జైరామ్‌కు సోదరుడిలాంటి అనుబంధం ఉంటుంది. అయితే ఆధి హాస్టల్‌లో అనుమానాస్పదంగా మృతి చెందడంతో జైరామ్ ఆ కేసు దర్యాప్తు చేపడతాడు. ఇక్కడే అసలు మిస్టరీ మొదలవుతుంది. దర్యాప్తులో ఆధి వేలిముద్రలు మరో ఇద్దరు మృతుల వేలిముద్రలతో కూడా సరిపోతున్నట్లు తెలుస్తుంది. ఆశ్చర్యకరమైన విషయం ఏమిటంటే.. ఆ ముగ్గురూ ఒకే రోజున మరణించారు. ముగ్గురు వేర్వేరు వ్యక్తుల వేలిముద్రలు ఒకేలా ఎలా ఉంటాయి? ఈ మూడు మరణాలకు సంబంధం ఏమిటి? దీని వెనుక ఎవరు ఉన్నారు? హత్యలకు కారణం ఏమిటి? అనే ప్రశ్నలకు సమాధానాలను జైరామ్ తన దర్యాప్తు ద్వారా కనుగొనే ప్రయత్నం చేస్తాడు. ప్లస్ పాయింట్స్ పంచనామాకు ప్రధాన బలం దాని మిస్టరీ పాయింట్. మూడు మృతదేహాలు.. ఒకే వేలిముద్రలు అనే ఆలోచన మొదట్లో ఆసక్తిని రేకెత్తిస్తుంది. కథ ఎటు వెళ్తుందో తెలుసుకోవాలనే క్యూరియాసిటీని ఈ పాయింట్ కలిగిస్తుంది. భరత్ శ్రీనివాసన్ కూడా పోలీస్ ఆఫీసర్ పాత్రకు సరిపోయేలా సీరియస్ పెర్ఫార్మెన్స్ ఇచ్చారు. మెడికల్ క్రైమ్ నేపథ్యం కూడా కథకు కొంత కొత్తదనాన్ని తీసుకొచ్చే ప్రయత్నం చేస్తుంది. మైనస్ పాయింట్స్ అయితే మొదట్లో ఏర్పడిన ఆసక్తిని సిరీస్ చివరి వరకు కొనసాగించడంలో స్క్రీన్‌ప్లే విఫలమవుతుంది. దర్యాప్తు ముందుకు వెళ్లే కొద్దీ కథనం నెమ్మదిస్తుంది. థ్రిల్లర్‌కు అవసరమైన టెన్షన్, సస్పెన్స్ అన్ని సందర్భాల్లో బలంగా కనిపించవు. జైరామ్ దర్యాప్తు వ్యక్తిగత స్థాయికి చేరుకున్నప్పటికీ.. అతని పాత్రలో మరింత ఎమోషనల్ డెప్త్ ఉంటే ప్రేక్షకులు కథతో ఎక్కువగా కనెక్ట్ అయ్యే అవకాశం ఉండేది. కీలకమైన విలన్ రివీల్ వచ్చే సమయానికి కూడా కథలో వేగం తగ్గిపోవడంతో ఆ ట్విస్ట్ ఆశించిన స్థాయిలో ప్రభావం చూపదు. నటీనటుల పనితీరు భరత్ శ్రీనివాసన్ పోలీస్ ఆఫీసర్ పాత్రలో పర్వాలేదనిపించారు. పాత్రకు అవసరమైన సీరియస్‌నెస్‌ను ఆయన మెయింటైన్ చేశారు. అయితే కొన్ని ఎమోషనల్ సన్నివేశాల్లో మరింత వైవిధ్యం చూపించాల్సి ఉండేది. శివాజీ రాజా, మేధా రెడ్డి, చరణ్ బాబు తదితరులు తమ పాత్రల పరిధిలో నటించారు. అయితే బలహీనమైన రైటింగ్ కారణంగా సపోర్టింగ్ క్యారెక్టర్లకు పెద్దగా స్కోప్ దక్కలేదు. టెక్నికల్ అంశాలు దర్శకుడు మోహన్ శ్రీవత్స ఆసక్తికరమైన కథా పాయింట్‌ను ఎంచుకున్నప్పటికీ.. దానిని పూర్తి స్థాయి ఎంగేజింగ్ థ్రిల్లర్‌గా మలచడంలో విఫలమయ్యారు. స్క్రీన్‌ప్లే ఈ సిరీస్‌కు ప్రధాన బలహీనతగా నిలుస్తుంది. మరింత టైట్ నేరేషన్, బలమైన ట్విస్టులు, మెరుగైన క్యారెక్టర్ డెవలప్‌మెంట్ ఉంటే పంచనామా మరింత ఆసక్తికరంగా ఉండేది. నరేశ్ కుమారన్ అందించిన బ్యాక్‌గ్రౌండ్ స్కోర్ కొన్ని చోట్ల బాగున్నా.. కొన్ని సందర్భాల్లో రిపిటేటివ్‌గా అనిపిస్తుంది. సందీప్ కాంత్ ఎన్ సినిమాటోగ్రఫీ ఓకే. ఎడిటింగ్ మరింత షార్ప్‌గా ఉంటే ఇన్వెస్టిగేషన్‌కు మంచి పేస్ వచ్చేది. ప్రొడక్షన్ వాల్యూస్ కూడా యావరేజ్ స్థాయిలో ఉన్నాయి. తీర్పు పంచనామాలో ఆసక్తికరమైన మిస్టరీ పాయింట్ ఉంది. ముఖ్యంగా ఒకే వేలిముద్రలు కలిగిన ముగ్గురు మృతుల కాన్సెప్ట్ ప్రారంభంలో క్యూరియాసిటీని పెంచుతుంది. కానీ ఆ ఆసక్తిని చివరి వరకు కొనసాగించేంత బలమైన స్క్రీన్‌ప్లే లేకపోవడం ప్రధాన సమస్య. భరత్ శ్రీనివాసన్ తన పాత్రలో పర్వాలేదనిపించినా.. కథనం, స్క్రీన్‌ప్లే, ఎగ్జిక్యూషన్ కారణంగా సిరీస్ తన పూర్తి సామర్థ్యాన్ని చూపలేకపోయింది.