జులై 4 అంటే అమెరికా అంతా పండుగ వాతావరణం. కానీ 2026 మాత్రం మరింత ప్రత్యేకం. అమెరికా ఇండిపెండెన్స్ డేకు 250 సంవత్సరాలు పూర్తవుతున్న సందర్భంగా దేశవ్యాప్తంగా America250 వేడుకలు ఘనంగా జరుగుతున్నాయి.
ఈ వేడుకల్లో భారతీయ అమెరికన్లు కూడా ఉత్సాహంగా భాగస్వాములు అవుతున్నారు. టెక్నాలజీ, వైద్యం, విద్య, వ్యాపారం, ప్రజాసేవ... ప్రతి రంగంలో భారతీయ అమెరికన్లు అమెరికా అభివృద్ధిలో తమదైన ముద్ర వేస్తున్నారు. అందుకే ఈసారి "ఇండియా–80, అమెరికా–250" స్ఫూర్తితో కమ్యూనిటీ సేవా కార్యక్రమాలు, రక్తదాన శిబిరాలు, మొక్కల నాటే కార్యక్రమాలు చేపడుతున్నారు.
ఇప్పటికే ఫెడరేషన్ ఆఫ్ ఇండియన్ అసోసియేషన్స్–చికాగో జూన్ 26న భారీ కమ్యూనిటీ డిన్నర్ నిర్వహించి America250 వేడుకలకు శ్రీకారం చుట్టింది.
తెలుగు అసోసియేషన్ ఆఫ్ నార్త్ అమెరికా (తానా) – షార్లెట్ విభాగం జులై 18న భారీ రక్తదాన శిబిరాన్ని నిర్వహించేందుకు సిద్ధమవుతుండగా...
ఫౌండేషన్ ఆఫ్ ఇండియన్ అమెరికన్స్ – న్యూ ఇంగ్లాండ్ విభాగం America250 సందర్భంగా 250 మొక్కలు నాటే కార్యక్రమాన్ని చేపట్టి పర్యావరణ పరిరక్షణకు తన వంతు బాధ్యతను నిర్వర్తిస్తోంది.
ఇలా తెలుగు, కన్నడ, గుజరాతీ వంటి భారతీయ సంఘాలు అమెరికా ఇండిపెండెన్స్ డేను పురస్కరించుకుని ప్రత్యేక కార్యక్రమాలు నిర్వహిస్తున్నాయి.
స్వేచ్ఛ, ప్రజాస్వామ్యం, సేవాభావానికి ప్రతీకగా నిలిచిన అమెరికా 250వ ఇండిపెండెన్స్ డే వేడుకలు... భారతీయ అమెరికన్ల సేవా స్ఫూర్తిని, రెండు దేశాల మధ్య ఉన్న బలమైన బంధాన్ని మరోసారి చాటిచెబుతున్నాయి.
