అమెరికాలో తెలుగు ప్రజలు ఎంతో ఆసక్తిగా ఎదురుచూస్తున్న టీటీఏ మెగా కన్వెన్షన్ కు కౌంట్డౌన్ ప్రారంభమైంది. నార్త్ కరోలినాలోని షార్లెట్ కన్వెన్షన్ సెంటర్ వేదికగా జులై 17 నుంచి 19 వరకు మూడు రోజుల పాటు ఈ మహాసభలు అత్యంత వైభవంగా నిర్వహించేందుకు ఏర్పాట్లు ముమ్మరంగా సాగుతున్నాయి.
ఈసారి కన్వెన్షన్లో ఆస్కార్ అవార్డు గ్రహీత, ప్రముఖ సంగీత దర్శకుడు ఎం.ఎం. కీరవాణి అందించే గ్రాండ్ లైవ్ మ్యూజికల్ కాన్సర్ట్ ప్రధాన ఆకర్షణగా నిలవనుంది. తన అద్భుతమైన స్వరాలతో ప్రపంచవ్యాప్తంగా కోట్లాది సంగీతాభిమానులను అలరించిన కీరవాణి, ఈ ప్రత్యేక వేదికపై తన చిరస్మరణీయ గీతాలతో ప్రేక్షకులను సంగీత విహారంలో ముంచెత్తనున్నారు. తెలుగు సినీ సంగీత వైభవాన్ని ప్రతిబింబించే ఈ సంగీత విభావరి కన్వెన్షన్కు హాజరయ్యే వారందరికీ మరపురాని అనుభూతిని అందించనుంది.
అంతేకాకుండా ప్రముఖ మ్యూజిక్ బ్యాండ్స్ ఆరెంజ్ స్ట్రీట్ మరియు త్రీఓరి (Threeory) తమ ఎనర్జిటిక్ లైవ్ పెర్ఫార్మెన్స్లతో సందడి చేయనున్నాయి. మరోవైపు పరంపర బృందంతో పాటు అంతర్జాతీయ ఖ్యాతి గాంచిన గ్రెగరీ హ్యాన్కాక్ డాన్స్ థియేటర్ కళాకారులు భారతీయ సంప్రదాయం, ఆధునిక నృత్య శైలుల సమ్మేళనంతో అద్భుతమైన సాంస్కృతిక ప్రదర్శనలు అందించనున్నారు. సంగీతం, నృత్యం, వినోదం కలగలిపిన ఈ ప్రత్యేక కార్యక్రమాలు టీటీఏ మెగా కన్వెన్షన్ను మరింత వైభవంగా మార్చనున్నాయి.
వినోద కార్యక్రమాలతో పాటు అన్ని వర్గాల వారిని ఆకట్టుకునేలా ఈ మెగా కన్వెన్షన్లో విభిన్న కార్యక్రమాలను టీటీఏ రూపొందించింది. టీటీఏ అవార్డుల ప్రదానం, శ్రీనివాస కళ్యాణం, సీఎంఈ సెషన్లు, బిజినెస్ సెమినార్లు, స్టార్టప్ ఫోరమ్, ఉమెన్స్ ఫోరమ్, యూత్ ఫోరమ్, బ్యూటీ పేజెంట్, వెండార్ ఎగ్జిబిషన్, పొలిటికల్ ఫోరమ్, మ్యాట్రిమోనీ మీట్ వంటి అనేక ప్రత్యేక కార్యక్రమాలు నిర్వహించనున్నారు.
ఈ మహాసభలను విజయవంతం చేసేందుకు టీటీఏ అధ్యక్షుడు నవీన్ రెడ్డి మల్లిపెద్ది, కన్వీనర్ ప్రవీణ్ చింత, కోఆర్డినేటర్లు నరేన్ దేవరపల్లి, శేఖర్ రెడ్డి, అడ్వైజరీ కౌన్సిల్, ఎగ్జిక్యూటివ్ కమిటీ సభ్యులు, వాలంటీర్లు సమన్వయంతో విస్తృత ఏర్పాట్లు చేస్తున్నారు.
తెలుగు సంస్కృతి, సంప్రదాయాలు, వ్యాపారం, విద్య, యువత, కుటుంబ విలువలను ఒకే వేదికపైకి తీసుకువచ్చే ఈ టీటీఏ మెగా కన్వెన్షన్–2026 అమెరికాలోని తెలుగు సమాజానికి మరో చిరస్మరణీయ వేడుకగా నిలవనుందని నిర్వాహకులు ఆశాభావం వ్యక్తం చేస్తున్నారు.
