అమెరికాలోని బాల్టిమోర్ నగరం వేదికగా నిర్వహించిన అమెరికన్ తెలుగు అసోసియేషన్ (ATA) 19వ కాన్ఫరెన్స్ & యూత్ కన్వెన్షన్ మహాసభలు అత్యంత వైభవంగా, నభూతో నభవిష్యతి అన్న రీతిలో ఘనంగా ముగిశాయి. మూడు రోజుల పాటు వేలాది మంది తెలుగు ప్రవాసులను ఒకే వేదికపైకి తీసుకువచ్చిన ఈ మహాసభలు తెలుగు సంస్కృతి, సేవా భావం, ఐక్యతకు ప్రతీకగా నిలిచాయి.
ఆటా అధ్యక్షుడు జయంత్ చల్లా నాయకత్వంలో మొత్తం ATA బృందం ఈ మహాసభలను అత్యంత ప్రతిష్టాత్మకంగా నిర్వహించింది. దాదాపు 70 కమిటీలు, వందలాది మంది వాలంటీర్లు రేయింబవళ్లు శ్రమించి ప్రతి కార్యక్రమాన్ని విజయవంతం చేశారు. వేదిక నిర్వహణ నుంచి అతిథుల ఆతిథ్యం వరకు, సాంస్కృతిక కార్యక్రమాల నుంచి యువత కోసం ప్రత్యేక సెషన్ల వరకు ప్రతి అంశాన్ని అత్యంత సమన్వయంతో నిర్వహించి ప్రశంసలు అందుకున్నారు.
ఈ మహాసభల విజయానికి కన్వీనర్ శ్రీధర్ బనాలా, కోఆర్డినేటర్ రవి చల్లా, నేషనల్ కోఆర్డినేటర్ శరత్ వేముల, డైరెక్టర్ సుధీర్ దామిడి, కో-కోఆర్డినేటర్ జీనత్ కుందూర్, కో-కన్వీనర్ అరవింద్ ముప్పిడి, కో-నేషనల్ కోఆర్డినేటర్ కౌశిక్, కాన్ఫరెన్స్ రీజినల్ కోఆర్డినేటర్ తిరుమల రెడ్డి మునుకుంట్ల, కో-డైరెక్టర్ కిరణ్ ఆలాతో పాటు అనేక మంది కమిటీ సభ్యులు విశేష కృషి చేశారు. అందరి సమిష్టి కృషితో ఈ మహాసభలు విజయవంతంగా నిలిచి ATA చరిత్రలో మరో మైలురాయిగా నిలిచాయి.
మూడు రోజుల పాటు జరిగిన ఈ వేడుకల్లో ఆధ్యాత్మిక, సినీ, రాజకీయ, వ్యాపార, వైద్య రంగాలకు చెందిన ప్రముఖులు పాల్గొని సభలకు ప్రత్యేక ఆకర్షణగా నిలిచారు. సాంస్కృతిక కార్యక్రమాలు, సంగీత విభావరి, సాహిత్య చర్చలు, యువత కోసం ప్రత్యేక సెషన్లు, వ్యాపార సదస్సులు, వైద్య సదస్సులు, సామాజిక సేవా కార్యక్రమాలు పాల్గొన్న ప్రతి ఒక్కరినీ ఆకట్టుకున్నాయి.
1991లో స్థాపించబడిన ATA ఈ ఏడాదితో 35 వసంతాలు పూర్తి చేసుకుంది. మూడు దశాబ్దాలకు పైగా అమెరికాలోని తెలుగు ప్రవాసుల కోసం సాంస్కృతిక, సామాజిక, విద్యా, సేవా కార్యక్రమాలను నిరంతరం నిర్వహిస్తూ విశ్వసనీయ సంస్థగా ఎదిగింది. ప్రవాస భారతీయులు ఎదుర్కొనే అనేక సమస్యల సమయంలో అండగా నిలుస్తూ, అవసరమైన సహాయ సహకారాలు అందిస్తూ తెలుగు సమాజంలో ప్రత్యేక స్థానం సంపాదించుకుంది.
యువతను తెలుగు భాష, సంస్కృతితో అనుసంధానం చేయడం, వ్యాపారవేత్తలకు నెట్వర్కింగ్ అవకాశాలు కల్పించడం, వైద్య శిబిరాలు, విద్యా కార్యక్రమాలు నిర్వహించడం వంటి అనేక కార్యక్రమాల ద్వారా ATA తన సేవలను విస్తరించింది. అలాగే మాతృభూమిలోని ప్రజల కోసం ATA ఫౌండేషన్ ఆధ్వర్యంలో విద్య, వైద్యం, ప్రకృతి విపత్తులు, వరదలు, కోవిడ్ వంటి అత్యవసర పరిస్థితుల్లో కోట్లాది రూపాయల విలువైన సేవా కార్యక్రమాలను నిర్వహించి మానవతా దృక్పథాన్ని చాటుకుంది.
బాల్టిమోర్లో జరిగిన 19వ ATA కాన్ఫరెన్స్ కేవలం ఒక వార్షిక సమావేశం మాత్రమే కాకుండా, ప్రపంచవ్యాప్తంగా ఉన్న తెలుగు వారిని ఒకే కుటుంబంగా ఏకం చేసిన మహా వేడుకగా నిలిచింది. సేవ, సంస్కృతి, సమన్వయం, నాయకత్వం కలిసొస్తే ఎంతటి మహత్తర కార్యక్రమాన్నైనా విజయవంతంగా నిర్వహించవచ్చని మరోసారి ATA నిరూపించింది.
