వైఎస్సార్ 17వ వర్ధంతి సందర్భంగా కొనసాగుతున్న సేవా కార్యక్రమాల్లో భాగంగా డల్లాస్లో రక్తదాన శిబిరాన్ని నిర్వహించారు. డాక్టర్ వైఎస్సార్ ఫౌండేషన్ ఆధ్వర్యంలో సెప్టెంబర్ 26న టెక్సాస్లోని కాపెల్లో ఉన్న Coppell Emergency Medical Center (Coppell ER)లో ఈ కార్యక్రమం జరిగింది. ఉదయం 10 గంటల నుంచి సాయంత్రం 4 గంటల వరకు జరిగిన శిబిరానికి పలువురు రక్తదాతలు స్వచ్ఛందంగా తరలివచ్చి రక్తదానం చేశారు.
వైఎస్సార్ను కేవలం స్మరించుకోవడానికే పరిమితం కాకుండా, ఆయన ప్రజాసేవా స్ఫూర్తిని ఆచరణలో చూపించాలనే ఉద్దేశంతో ఈ కార్యక్రమాన్ని నిర్వహించినట్లు నిర్వాహకులు తెలిపారు. రక్తదానం ద్వారా సేకరించిన రక్తం అవసరమైన రోగులకు ఉపయోగపడుతుందని, ఒకరి రక్తదానం మరొకరి ప్రాణాన్ని నిలబెట్టే అవకాశం కల్పిస్తుందని పేర్కొన్నారు.
ఈ సందర్భంగా నిర్వాహకుల్లో ఒకరైన డాక్టర్ రాజేంద్రపోలు మాట్లాడుతూ, ప్రజల సంక్షేమం కోసం జీవితాన్ని అంకితం చేసిన వైఎస్సార్ను సేవా కార్యక్రమం ద్వారా స్మరించుకోవడం ఆనందంగా ఉందన్నారు. రక్తదానం ఆయన సేవా దృక్పథాన్ని ప్రతిబింబించే కార్యక్రమంగా నిలిచిందని తెలిపారు. మరో నిర్వాహకుడు సుధాకర్ మేనకూరు మాట్లాడుతూ, పెద్ద సంఖ్యలో దాతలు ముందుకు రావడం సంతోషంగా ఉందన్నారు.
కార్యక్రమంలో Carter BloodCare ప్రతినిధులు Aaron Devlin, Holly, అలాగే Coppell ER మార్కెటింగ్ మేనేజర్ Muhammad Shahid సహకరించారు. వారి సహకారానికి నిర్వాహకులు ప్రత్యేక కృతజ్ఞతలు తెలిపారు.
రక్తదాన శిబిరానికి వల్లూరు శివశంకర్ రెడ్డి, నాగార్జున రెడ్డి దారుకమల్లి, సుబ్రమణ్యం రెడ్డి, ఆర్.బి. నాగరాజ్ గోపిరెడ్డి, వీరశివ రెడ్డి, శ్రీకాంత్ రెడ్డి జొన్నాల, చైతన్య రెడ్డి, తరుణ్ రెడ్డి తదితరులు నాయకత్వం వహించారు. పలువురు స్వచ్ఛంద రక్తదాతలు కార్యక్రమంలో పాల్గొని తమ వంతు సహకారం అందించారు.
నాటా మాజీ అధ్యక్షుడు డాక్టర్ కోర్సపాటి శ్రీధర్ రెడ్డి రక్తదాన శిబిరాన్ని సందర్శించి నిర్వాహకులు, రక్తదాతలు, సమన్వయకర్తలు, స్వచ్ఛంద సేవకులను అభినందించారు. వైఎస్సార్ ఆశయాలకు అనుగుణంగా ఇలాంటి సామాజిక సేవా కార్యక్రమాల్లో భాగస్వామ్యం కావడం సంతోషంగా ఉందని ఆయన పేర్కొన్నారు.
అమెరికా వైఎస్సార్సీపీ కన్వీనర్ కృష్ణారెడ్డి కోడూరు మాట్లాడుతూ, వైఎస్సార్ ఆశయాలను అనుసరిస్తూ సేవా కార్యక్రమాల్లో పాల్గొనడం గర్వంగా ఉందన్నారు. మరో కన్వీనర్ శివ అన్నపరెడ్డి మాట్లాడుతూ, ప్రజల కోసం వైఎస్సార్ చేసిన సేవలను స్ఫూర్తిగా తీసుకుని ఇలాంటి రక్తదాన శిబిరాలను నిర్వహించడం ద్వారా ఆ సేవా స్ఫూర్తిని కొనసాగించవచ్చని తెలిపారు. డల్లాస్ వైఎస్సార్సీపీ నాయకుడు సుబ్బారావు కొండు కూడా సామాజిక కార్యక్రమాల్లో భాగస్వామ్యం కావడం ఆనందంగా ఉందని అన్నారు.
ఈ కార్యక్రమాన్ని ప్రసాద్ రెడ్డి నాగారపు, శ్రీనివాస్ ముక్క, యెల్లారెడ్డి చలమల, భాస్కర్ రెడ్డి గడికోట, నాగేశ్వర్ రెడ్డి వెన్నపూస, శివశంకర్ రెడ్డి పోతన్ తదితరులు సమన్వయం చేశారు.
వైఎస్సార్ వర్ధంతి సందర్భంగా నిర్వహించిన ఈ రక్తదాన శిబిరం ద్వారా డల్లాస్లోని ప్రవాసులు స్మరణను సామాజిక సేవతో ముడిపెట్టారు. వర్ధంతి కార్యక్రమాలకు ఒక సేవా కోణాన్ని జోడిస్తూ, రక్తదానం వంటి ప్రజోపయోగ కార్యక్రమాల ద్వారా సమాజానికి తమ వంతు సహకారం అందించారు.
