భారత రాయబార కార్యాలయంలో చిన్నారులకు పెయింటింగ్ పోటీలు, కథల వేదిక

అమెరికాలోని భారతీయ ప్రవాస చిన్నారుల ప్రతిభను ప్రోత్సహించే లక్ష్యంతో వాషింగ్టన్ డీసీలోని భారత రాయబార కార్యాలయం (Embassy of India) డీసీ ఇండియన్ స్పౌసెస్ అసోసియేషన్ సహకారంతో ప్రత్యేక కార్యక్రమాన్ని నిర్వహించనుంది. ఆగస్టు 8, 2026న చిన్నారుల కోసం పెయింటింగ్ పోటీలు మరియు ప్రముఖ కథాకారిణి శిల్పా దాస్ గుప్తాతో స్టోరీ టెల్లింగ్ సెషన్ నిర్వహిస్తున్నట్లు నిర్వాహకులు ప్రకటించారు.

6 నుంచి 16 సంవత్సరాల మధ్య వయస్సు గల భారతీయ మూలాల పిల్లలు ఈ కార్యక్రమంలో పాల్గొనవచ్చు. పెయింటింగ్ పోటీ ఉదయం 11:00 గంటల నుంచి 12:00 గంటల వరకు, అనంతరం 12:00 నుంచి 1:00 గంటల వరకు కథల కార్యక్రమం జరగనుంది. పాల్గొనే చిన్నారులకు అవసరమైన ఆర్ట్ మెటీరియల్స్‌ను నిర్వాహకులే అందించనున్నారు.

ఈ కార్యక్రమం వాషింగ్టన్ డీసీలోని భారత రాయబార కార్యాలయం ప్రాంగణంలో జరగనుంది. పోటీలో విజేతలైన చిన్నారులను ఆగస్టు 15న జరిగే భారత స్వాతంత్ర్య దినోత్సవ వేడుకల్లో అమెరికాలోని భారత రాయబారి చేతుల మీదుగా సత్కరించనున్నారు.

పోటీ సమయంలో డిజిటల్ పరికరాల వినియోగానికి అనుమతి ఉండదని నిర్వాహకులు స్పష్టం చేశారు. ఆసక్తి ఉన్నవారు జూలై 31, 2026లోపు నమోదు చేసుకోవాలని, పరిమిత సంఖ్యలో మాత్రమే సీట్లు అందుబాటులో ఉన్నాయని తెలిపారు.