తెలుగు సంస్కృతి, భారతీయ ఆధ్యాత్మికత, కళా వైభవం... ఈ మూడు ఒకే వేదికపై కలిస్తే ఎలా ఉంటుందో అమెరికాలో మరోసారి నిరూపించింది SANATHAN సంస్థ. విదేశీ నేలపై తెలుగు సాంస్కృతిక వారసత్వాన్ని ప్రపంచానికి పరిచయం చేసే లక్ష్యంతో నిర్వహించిన "హర హర మహాదేవ" గ్రాండ్ తెలుగు లైవ్ డివైన్ డ్రామా ప్రేక్షకులను భక్తి పారవశ్యంలో ముంచెత్తింది.
ఆగస్టు 1, 2026న అమెరికాలోని న్యూజెర్సీ రాష్ట్రం, ఈస్ట్ బ్రన్స్విక్లోని JMPAC వేదికగా జరిగిన ఈ అద్భుత ఆధ్యాత్మిక ప్రదర్శనకు తెలుగు కుటుంబాలు భారీగా హాజరయ్యాయి. రంగస్థలంపై ఆవిష్కరించిన ప్రతి ఘట్టం ప్రేక్షకులను శివలోకానికే తీసుకెళ్లిన అనుభూతిని కలిగించింది.
శివపురాణంలోని అత్యంత ప్రసిద్ధ ఘట్టాలైన లింగోద్భవం, దక్ష యజ్ఞం, పార్వతి కళ్యాణం, గంగావతరణం, గజాసుర సంహారం, రావణ దర్పభంగం వంటి దివ్య కథలను అత్యాధునిక లైటింగ్, విజువల్ ఎఫెక్ట్స్, సంగీతం, రంగస్థల రూపకల్పనతో జీవంతంగా ఆవిష్కరించారు. ప్రతి సన్నివేశం ముగిసినప్పుడల్లా ప్రేక్షకుల నుంచి ఘనమైన చప్పట్లు మార్మోగాయి.
ఈ కార్యక్రమంలో మరో విశేష ఆకర్షణగా నిలిచింది 150 మందికి పైగా విద్యార్థులు పాల్గొన్న భారీ నృత్య ప్రదర్శన. భక్తి, భారతీయ సంప్రదాయం, తెలుగు సంస్కృతిని ప్రతిబింబించే ఈ నృత్య రూపకాలు ప్రేక్షకులను విశేషంగా ఆకట్టుకున్నాయి. చిన్నారుల ప్రతిభ, వారి సమన్వయం, వేదికపై కనబరిచిన అంకితభావం అందరి ప్రశంసలు అందుకుంది.
కేవలం ఒక నాటక ప్రదర్శనగానే కాకుండా, విదేశాల్లో పెరుగుతున్న కొత్త తరానికి తెలుగు సంస్కృతి, పురాణాల గొప్పతనాన్ని పరిచయం చేసే సాంస్కృతిక ఉద్యమంగా ఈ కార్యక్రమం నిలిచింది. కుటుంబ సమేతంగా హాజరైన తెలుగు ప్రవాసులు కార్యక్రమం ముగిసే వరకు ఆసక్తిగా వీక్షించి నిర్వాహకులను అభినందించారు.
కార్యక్రమం అనంతరం భక్తులకు మహా ప్రసాదాన్ని పంపిణీ చేయగా, ఆధ్యాత్మిక వాతావరణంలో భక్తి భావాలు మరింత ఉట్టిపడ్డాయి.
ఈ మహా కార్యక్రమాన్ని విజయవంతం చేసిన ప్రతి ఒక్కరికీ Sanathan Inc. వ్యవస్థాపకులు శేషగిరి రావు కంభమ్మెట్టు, సురేష్ కాజానా, డైరెక్టర్లు సరిత కంభమ్మెట్టు, శ్యామల కాజానా హృదయపూర్వక కృతజ్ఞతలు తెలిపారు. కళాకారులు, వాలంటీర్లు, తల్లిదండ్రులు, దాతలు, ప్రేక్షకుల సహకారంతోనే ఈ దివ్య నాటకాన్ని ఘన విజయంగా నిలపగలిగామని వారు పేర్కొన్నారు.
"హర హర మహాదేవ" కేవలం ఒక రంగస్థల ప్రదర్శన మాత్రమే కాదు... విదేశీ నేలపై తెలుగు ఆధ్యాత్మిక వారసత్వాన్ని, భారతీయ సంస్కృతి గొప్పతనాన్ని భావితరాలకు చేరవేసిన ఓ చారిత్రాత్మక సాంస్కృతిక యజ్ఞంగా నిలిచిపోయింది.
