అమెరికాలో బిలియన్ డాలర్ల విలువైన స్టార్టప్ కంపెనీల స్థాపనలో భారతీయులు అగ్రస్థానంలో నిలిచారు. నేషనల్ ఫౌండేషన్ ఫర్ అమెరికన్ పాలసీ తాజా అధ్యయనం ప్రకారం, భారతీయ మూలాలు కలిగిన వ్యాపారవేత్తలు స్థాపించిన 96 యూనికార్న్ కంపెనీలు ప్రస్తుతం అమెరికాలో ఉన్నాయి. ఈ సంఖ్యతో భారత్ ప్రపంచంలోని అన్ని దేశాల కంటే ముందంజలో నిలిచింది. ఇజ్రాయెల్ 60, యూకే 47, చైనా 41 యూనికార్న్ కంపెనీలతో తర్వాతి స్థానాల్లో ఉన్నాయి.
అమెరికాలో నివసిస్తున్న సుమారు 50 లక్షల భారతీయ వలసదారుల్లో ప్రతి 50 వేల మందిలో ఒకరు బిలియన్ డాలర్ల కంపెనీని స్థాపించినట్లు నివేదిక తెలిపింది. సైబర్ సెక్యూరిటీ సంస్థ Zscaler వ్యవస్థాపకుడు Jay Chaudhry 13.1 బిలియన్ డాలర్ల నికర సంపదతో అత్యంత సంపన్న భారతీయ వలస వ్యవస్థాపకుడిగా నిలిచారు. ఈ గణాంకాలు అమెరికా స్టార్టప్ రంగంలో భారతీయుల ప్రభావాన్ని స్పష్టంగా చూపిస్తున్నాయి.
