2026 ఏషియన్ గేమ్స్లో భారత్ తొలి స్వర్ణ పతకాన్ని ఖాతాలో వేసుకుంది. మహిళల క్రికెట్ జట్టు మంగళవారం జరిగిన టీ20 ఫైనల్లో శ్రీలంకను 147 పరుగుల తేడాతో చిత్తుగా ఓడించి గోల్డ్ మెడల్ సొంతం చేసుకుంది.
హర్మన్ప్రీత్ కౌర్ నాయకత్వంలోని భారత జట్టు బ్యాటింగ్, బౌలింగ్లో పూర్తి ఆధిపత్యం ప్రదర్శించింది. టాస్ గెలిచి ముందుగా బ్యాటింగ్ చేసిన భారత్ 20 ఓవర్లలో 216/3 పరుగులు చేసింది. అనంతరం శ్రీలంకను కేవలం 69 పరుగులకే 15.4 ఓవర్లలో ఆలౌట్ చేసింది.
చెలరేగిన స్మృతి మంధాన
భారత్ భారీ స్కోరు చేయడంలో ఓపెనర్ స్మృతి మంధాన కీలక పాత్ర పోషించింది. ఆమె కేవలం 45 బంతుల్లో 79 పరుగులు చేసింది. ఇందులో ఏడు సిక్సర్లు, ఐదు ఫోర్లు ఉన్నాయి.మంధాన, షఫాలీ వర్మ కలిసి తొలి వికెట్కు 99 పరుగుల భాగస్వామ్యం నెలకొల్పారు. షఫాలీ 29 బంతుల్లో 48 పరుగులు చేసింది.
ఇక చివర్లో రిచా ఘోష్ విధ్వంసకర బ్యాటింగ్తో ఆకట్టుకుంది. ఆమె కేవలం 22 బంతుల్లోనే 49 పరుగులు చేసి భారత్ స్కోరును 200 మార్క్ దాటించింది.భారత్ చేసిన 216/3 స్కోరు ఏషియన్ గేమ్స్ మహిళల క్రికెట్ చరిత్రలో అత్యధిక స్కోరుగా నమోదైంది.
శ్రీలంకను చిత్తు చేసిన భారత బౌలర్లు
భారీ లక్ష్యంతో బరిలోకి దిగిన శ్రీలంకకు భారత బౌలర్లు ఏమాత్రం అవకాశం ఇవ్వలేదు.
దీప్తి శర్మ అద్భుత బౌలింగ్తో నాలుగు ఓవర్లలో కేవలం ఆరు పరుగులు ఇచ్చి మూడు వికెట్లు పడగొట్టింది. షఫాలీ వర్మ, శ్రీ చరణి, శ్రేయాంక పాటిల్ తలో రెండు వికెట్లు తీశారు.శ్రీలంక తరఫున కెప్టెన్ చమరి ఆటపట్టు 29 పరుగులు చేయగా, మిగతా బ్యాటర్లు భారత బౌలింగ్ను ఎదుర్కోలేకపోయారు. చివరికి 69 పరుగులకే శ్రీలంక ఆలౌటైంది.
ఏషియన్ గేమ్స్లో టైటిల్ నిలబెట్టుకున్న భారత్
ఈ విజయంతో భారత్ మహిళల టీ20 క్రికెట్లో తన ఏషియన్ గేమ్స్ స్వర్ణ పతకాన్ని నిలబెట్టుకుంది. గత ఏషియన్ గేమ్స్లోనూ భారత మహిళల జట్టే గోల్డ్ మెడల్ సాధించింది.అదే సమయంలో 2026 ఏషియన్ గేమ్స్లో భారత్కు ఇదే తొలి స్వర్ణ పతకం.క్రికెట్లో భారత్కు ఇది రెండో ఏషియన్ గేమ్స్ గోల్డ్ మెడల్. ఈ విభాగంలో రెండు స్వర్ణాలు సాధించిన దేశాల జాబితాలో భారత్ పాకిస్థాన్తో కలిసి నిలిచింది.
మంధాన మరో అరుదైన రికార్డు
ఫైనల్ మ్యాచ్లో స్మృతి మంధాన మరో అరుదైన ఘనత సాధించింది. ఆమె అంతర్జాతీయ క్రికెట్లో 11,000 పరుగులు పూర్తి చేసిన తొలి మహిళా క్రికెటర్గా రికార్డు సృష్టించింది.
శ్రీలంకపై ఘన విజయం తర్వాత భారత్ ఖాతాలో ప్రస్తుతం ఒక స్వర్ణం, నాలుగు రజతాలు, రెండు కాంస్యాలు ఉన్నాయి.
