అమెరికాలో జరిగిన ఘోర రోడ్డు ప్రమాదంలో రాష్ట్రానికి చెందిన ముగ్గురు యువకులు ప్రాణాలు కోల్పోయారు. ఫ్లోరిడా రాష్ట్రంలో బుధవారం చోటుచేసుకున్న ప్రమాదంలో మృతిచెందిన వారిలో నిజామాబాద్ జిల్లా నవీపేట్కు చెందిన రాహుల్ అనే యువకుడు ఉన్నట్లు అధికారులు గుర్తించారు. ఉన్నత భవిష్యత్తు లక్ష్యంతో రాహుల్ కేవలం మూడు నెలల క్రితమే అమెరికాకు వెళ్లాడు. అక్కడ ప్రయాణిస్తున్న సమయంలో జరిగిన రోడ్డు ప్రమాదంలో అతడు ప్రాణాలు కోల్పోవడంతో స్వగ్రామంలో తీవ్ర విషాదఛాయలు అలుముకున్నాయి.
అమెరికా వెళ్లి కొద్దిరోజులకే రాహుల్ మృతి చెందాడనే వార్త వినడంతో కుటుంబ సభ్యులు, స్నేహితులు కన్నీరుమున్నీరుగా విలపిస్తున్నారు. ఈ ప్రమాదం ఏ వాహనంలో ప్రయాణిస్తున్నప్పుడు జరిగింది, అసలు ప్రమాదానికి గల కారణాలేమిటనే కోణంలో స్థానిక అమెరికన్ పోలీసులు దర్యాప్తు జరుపుతున్నారు. రాహుల్తో పాటు ప్రమాదంలో మరణించిన మిగిలిన ఇద్దరు యువకుల వివరాలు, ఈ ఘటనకు సంబంధించిన పూర్తి సమాచారం వెలువడాల్సి ఉంది. కాగా, రాహుల్ భౌతికకాయాన్ని స్వస్థలానికి తీసుకురావడానికి కుటుంబ సభ్యులు ఏర్పాట్లు చేస్తున్నారు.
