హైదరాబాద్లో వర్షాకాలంలో ప్రజలకు ఇబ్బందులు తలెత్తకుండా ఉండేందుకు గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) 10 రోజుల ప్రత్యేక మాన్సూన్ డ్రైవ్ ప్రారంభించింది. తొలి రోజే నగరంలోని 30 వార్డుల్లో విస్తృత స్థాయిలో పారిశుద్ధ్య, మౌలిక వసతుల పనులు చేపట్టింది.
ఈ డ్రైవ్లో భాగంగా 36 మెట్రిక్ టన్నుల పాత మున్సిపల్ ఘన వ్యర్థాలు, 61.5 మెట్రిక్ టన్నుల నిర్మాణ, కూల్చివేత వ్యర్థాలు (C&D Waste) తొలగించారు. మొత్తంగా 97.5 మెట్రిక్ టన్నులకుపైగా వ్యర్థాలను నగరం నుంచి తొలగించినట్లు జీహెచ్ఎంసీ వెల్లడించింది.
వర్షాలకు ముందస్తు చర్యల్లో భాగంగా 109 గుంతలను పూడ్చడం, 105 క్యాచ్పిట్లను శుభ్రపరచడం, 5 కల్వర్ట్లలో పేరుకుపోయిన మట్టిని తొలగించడం చేపట్టారు. అలాగే 16.78 మెట్రిక్ టన్నుల తేలియాడే చెత్త, సిల్ట్ను తొలగించారు.
పర్యావరణ పరిరక్షణ చర్యల్లో భాగంగా 19 వర్షపు నీటి సంరక్షణ నిర్మాణాల (Rainwater Harvesting Structures) పనులు ప్రారంభించగా, 30 వాణిజ్యేతర భవనాలను సర్వే చేశారు. అదనంగా 22 ప్రజా మరుగుదొడ్లను తనిఖీ చేసి, వ్యర్థాల నిర్వహణ కోసం 99 కమర్షియల్ డస్ట్బిన్లను వ్యాపార సంస్థలకు ఏర్పాటు చేశారు.
ప్రజారోగ్య కార్యక్రమాల్లో భాగంగా దోమల నివారణ కోసం పైరేత్రం స్ప్రేయింగ్, వీధి కుక్కలకు వ్యాక్సినేషన్, అవసరమైన చోట్ల వాటి తరలింపు వంటి చర్యలు చేపట్టారు. అలాగే 34.9 మెట్రిక్ టన్నుల చెట్ల కొమ్మలు, 31 పార్కుల నుంచి 9 మెట్రిక్ టన్నుల పొడి, పచ్చి వ్యర్థాలను తొలగించారు.
జీహెచ్ఎంసీ అధికారులు ఈ 10 రోజుల ప్రత్యేక డ్రైవ్ ద్వారా నగరంలో పారిశుద్ధ్యం మెరుగుపరచడం, వర్షాకాలంలో నీటి నిల్వలను తగ్గించడం, ప్రజారోగ్యాన్ని కాపాడడం ప్రధాన లక్ష్యమని తెలిపారు.
