పూల సుబ్బయ్య వెలిగొండ ప్రాజెక్టు ద్వారా ఆగస్టు నెలాఖరులోగా కృష్ణా జలాలను నల్లమల సాగర్ రిజర్వాయర్కు చేరవేస్తామని జలవనరుల శాఖ మంత్రి నిమ్మల రామానాయుడు తెలిపారు. ఈ లక్ష్యాన్ని సాధించేందుకు మిగిలిన పనులను వేగంగా పూర్తి చేయాలని అధికారులను ఆదేశించినట్లు వెల్లడించారు.
ప్రాజెక్టు పురోగతిని సమీక్షించిన మంత్రి, టన్నెల్ లైనింగ్, ఫీడర్ కాలువ, ఇతర మౌలిక సదుపాయాల పనులను నిర్ణీత గడువులో పూర్తి చేయాలని సూచించారు. మిగిలిన ఇంజినీరింగ్ పనులు చివరి దశలో ఉండటంతో త్వరలోనే కృష్ణా జలాలను రిజర్వాయర్కు మళ్లించే అవకాశం ఉందని పేర్కొన్నారు.
వెలిగొండ ప్రాజెక్టు ద్వారా శ్రీశైలం జలాశయం నుంచి కృష్ణా నది వరద జలాలను నల్లమల కొండల కింద నిర్మించిన జంట సొరంగాల ద్వారా నల్లమల సాగర్కు తరలిస్తారు. ప్రాజెక్టు పూర్తయిన తర్వాత 4.47 లక్షల ఎకరాలకు సాగునీరు, అలాగే ప్రకాశం, నెల్లూరు, కడప జిల్లాల్లో 15 లక్షల మందికి పైగా ప్రజలకు తాగునీరు అందించనున్నారు.
నిర్వాసిత కుటుంబాలకు పరిహారం, పునరావాస కార్యక్రమాలను కూడా వేగవంతం చేస్తున్నామని మంత్రి తెలిపారు. కరవు ప్రభావిత ప్రాంతాలకు దీర్ఘకాలిక నీటి భద్రత కల్పించే కీలక ప్రాజెక్టుగా వెలిగొండ ప్రాజెక్టును ప్రభుత్వం భావిస్తోంది.
