అమెరికన్ తెలుగు అసోసియేషన్ (ATA) ప్రతిష్టాత్మకంగా నిర్వహించనున్న 19వ మహాసభల సందడి అమెరికాలో ఘనంగా ప్రారంభమైంది. మే 16, 2026న డెలావేర్ రాష్ట్రంలోని విల్మింగ్టన్ నగరంలో ఉన్న డబుల్ ట్రీ హోటల్లో ఆటా బోర్డు సమావేశం, కాన్ఫరెన్స్ కిక్ ఆఫ్ కార్యక్రమాన్ని వైభవంగా నిర్వహించారు. అమెరికా నలుమూలల నుంచి ఆటా బోర్డు సభ్యులు, మాజీ అధ్యక్షులు, సేవా కార్యకర్తలు, తెలుగు సంఘాల ప్రతినిధులు భారీ సంఖ్యలో హాజరై కార్యక్రమాన్ని విజయవంతం చేశారు.
మే 15న ఏర్పాటు చేసిన స్వాగత విందుతో ప్రారంభమైన ఈ వేడుకలు, మే 16 సాయంత్రం నిర్వహించిన ‘కాన్ఫరెన్స్ కిక్ ఆఫ్ & ఫండ్రైజింగ్ డిన్నర్ గాలా’తో మరింత అట్టహాసంగా కొనసాగాయి. తెలుగు సంస్కృతి, సంప్రదాయాలను ప్రతిబింబించేలా నిర్వహించిన ఈ కార్యక్రమంలో సుమారు 400 మందికి పైగా అతిథులు పాల్గొని 19వ ATA మహాసభల విజయానికి తమ మద్దతు ప్రకటించారు.
ఈ సందర్భంగా ఆటా నాయకులు మాట్లాడుతూ, వచ్చే మహాసభలను గతంలో ఎన్నడూ లేనివిధంగా అత్యంత వైభవంగా నిర్వహించేందుకు అన్ని ఏర్పాట్లు చేస్తున్నట్లు తెలిపారు. తెలుగు సమాజ ఐక్యత, సేవా కార్యక్రమాలు, సాంస్కృతిక వారసత్వ పరిరక్షణకు ATA ఎప్పటికప్పుడు కృషి చేస్తోందని పేర్కొన్నారు. మహాసభలు తెలుగు ప్రజలకు మరపురాని అనుభూతిని అందిస్తాయని ఆశాభావం వ్యక్తం చేశారు.
