అమెరికాలోని గ్లోబల్ తెలంగాణ అసోసియేషన్ (GTA) అట్లాంటా చాప్టర్ ఆధ్వర్యంలో “GTA International Fest 2026” పేరిట భారీ అంతర్జాతీయ ఉత్సవాన్ని అత్యంత వైభవంగా నిర్వహించేందుకు సన్నాహాలు జరుగుతున్నాయి. చిన్న వ్యాపారాలను ప్రోత్సహించడం, వివిధ దేశాల సంస్కృతులను ఒకే వేదికపై పరిచయం చేయడం లక్ష్యంగా ఈ వేడుకను నిర్వహిస్తున్నారు.
ఈ మహోత్సవం జూన్ 6, 2026 శనివారం ఉదయం 11 గంటల నుంచి రాత్రి 9 గంటల వరకు అమెరికాలోని జార్జియా రాష్ట్రం కమ్మింగ్ నగరంలోని ఫౌలర్ పార్క్లో జరగనుంది. ఇప్పటికే ఈ కార్యక్రమానికి సంబంధించి రిజిస్ట్రేషన్లు ప్రారంభమయ్యాయి.
వివిధ దేశాల వంటకాల రుచులను ఆస్వాదించేలా “గ్లోబల్ ఫుడ్ ఎక్స్పీరియన్స్” ప్రత్యేక ఆకర్షణగా నిలవనుంది. ప్రపంచవ్యాప్తంగా ప్రసిద్ధి చెందిన వంటకాలను ఒకే చోట రుచి చూసే అవకాశం సందర్శకులకు లభించనుంది. అదేవిధంగా భారీ వెండర్ మార్కెట్లో ఫ్యాషన్ వస్త్రాలు, ఆభరణాలు, హస్తకళలు, హోమ్ డెకర్ ఉత్పత్తులు, బహుమతుల స్టాళ్లు సందడి చేయనున్నాయి.
పండుగ వాతావరణాన్ని మరింత ఉత్సాహభరితంగా మార్చేందుకు లైవ్ మ్యూజిక్ బ్యాండ్లు, సాంస్కృతిక కార్యక్రమాలు, స్టేజ్ షోలు రోజంతా కొనసాగనున్నాయి. చిన్నారుల కోసం ప్రత్యేకంగా కిడ్స్ జోన్ ఏర్పాటు చేయడంతో కుటుంబ సమేతంగా హాజరయ్యే వారికి వినోదం అందనుంది.
ఉత్తర జార్జియాలో ఇప్పటివరకు ఎప్పుడూ చూడని రీతిలో అంతర్జాతీయ సంస్కృతుల సమ్మేళనంగా ఈ వేడుక నిలవనుందని నిర్వాహకులు చెబుతున్నారు. ప్రపంచ దేశాల సంప్రదాయాలు, కళలు, ఆహార సంస్కృతులు ఒకే వేదికపై కనువిందు చేయనున్నాయి.
రిజిస్ట్రేషన్ పూర్తిగా ఉచితమని, అయితే స్థానాలు పరిమితంగా ఉండటంతో ముందుగానే నమోదు చేసుకోవాలని GTA ప్రతినిధులు సూచిస్తున్నారు. “మీ కుటుంబాన్ని, మీ స్నేహితులను వెంట తీసుకురండి… చరిత్ర సృష్టించే ఈ అంతర్జాతీయ వేడుకలో భాగస్వాములు కండి” అంటూ నిర్వాహకులు పిలుపునిచ్చారు.
