అమెరికాలోని తెలుగు ప్రవాసులు తెలంగాణ సాంప్రదాయాలను ఘనంగా కొనసాగిస్తున్నారు. న్యూయార్క్ తెలంగాణ తెలుగు సంఘం (NYTTA) ఆధ్వర్యంలో బోనాల పండుగను ఈ నెల జూలై 26, ఆదివారం ఘనంగా నిర్వహించనున్నారు.
ఈ వేడుకలు ఉదయం 10 గంటల నుంచి న్యూయార్క్లోని ఐసెన్హోవర్ పార్క్, ఈస్ట్ మెడోలో ప్రారంభం కానున్నాయి. తెలంగాణ సంస్కృతికి ప్రతీకగా నిలిచే ఈ వేడుకల్లో అమ్మవారికి బోనం సమర్పణ, పోతురాజుల విన్యాసాలు, సాంస్కృతిక కార్యక్రమాలు, భక్తి గీతాలు ప్రత్యేక ఆకర్షణగా నిలవనున్నాయి.
అలాగే కార్యక్రమానికి హాజరయ్యే ప్రతి ఒక్కరికీ సాంప్రదాయ తెలంగాణ వంటకాలతో ఉచిత భోజన ఏర్పాట్లు కూడా చేశారు. కార్యక్రమంలో పాల్గొనేందుకు నిర్వాహకులు ప్రత్యేక QR కోడ్ ద్వారా రిజిస్ట్రేషన్ సౌకర్యాన్ని కల్పించారు.
ప్రవాస తెలంగాణ కుటుంబాలు పెద్ద సంఖ్యలో పాల్గొని బోనాల పండుగను విజయవంతం చేయాలని NYTTA అధ్యక్షుడు రవీందర్ కొడెల్ల, కార్యవర్గ సభ్యులు పిలుపునిచ్చారు. తెలంగాణ ఆధ్యాత్మికత, సంస్కృతి, సంప్రదాయాలను విదేశీ గడ్డపై భావితరాలకు చేరవేయడమే ఈ కార్యక్రమం ప్రధాన ఉద్దేశమని నిర్వాహకులు తెలిపారు. బోనాలు తెలంగాణలో మహాకాళి అమ్మవారికి అంకితమైన ప్రముఖ సంప్రదాయ పండుగగా ప్రతి ఏటా ఆషాఢ మాసంలో జరుపుకుంటారు.
