తెలుగు కళా సమితి (TFAS) అధ్యక్షుడిగా గత రెండేళ్లుగా సేవలందించిన అన్నా మధు తన పదవీకాలాన్ని పూర్తి చేసుకుని బాధ్యతల నుంచి వైదొలిగారు. జూన్ 1 నుంచి సంస్థ కొత్త అధ్యక్షురాలిగా శ్రీమతి మాకం ఉమ బాధ్యతలు స్వీకరించారు. ఈ సందర్భంగా TFAS సభ్యులకు ఆయన ప్రత్యేక సందేశం అందిస్తూ తన అనుభవాలను, కృతజ్ఞతలను పంచుకున్నారు.
న్యూ జెర్సీలో నలభై రెండు సంవత్సరాలుగా తెలుగువారికి సేవ చేస్తున్న మన తెలుగు కళా సమితి అధ్యక్షునిగా రెండేళ్లు సేవలందించడం తన జీవితంలో లభించిన గొప్ప అవకాశం, అదృష్టంగా భావిస్తున్నట్లు అన్నా మధు పేర్కొన్నారు. విలువలు, సంస్కృతి, సామాజిక బాధ్యతలను ప్రతిబింబించే కార్యక్రమాల నిర్వహణే TFAS ప్రధాన లక్ష్యమని ఆయన తెలిపారు. ఆ దిశగా తనకు ఉన్న పరిజ్ఞానం, అనుభవంతో వివిధ రంగాలను స్పృశించేలా ఎన్నో కార్యక్రమాలను చేపట్టినట్లు వివరించారు.
తన రెండేళ్ల పదవీకాలంలో సంస్థ కార్యవర్గ సభ్యుల సహకారం ఎంతో కీలకమైందని ఆయన పేర్కొన్నారు. ముఖ్యంగా తనతో కలిసి పనిచేసిన ఎనిమిది మంది కార్యవర్గ సభ్యులు అంకితభావంతో, స్నేహపూర్వకంగా అందించిన సహకారం ఎప్పటికీ మరువలేనిదని అన్నారు. వారి సహకారం వల్లే అనేక కార్యక్రమాలు విజయవంతంగా నిర్వహించగలిగామని తెలిపారు.
అలాగే సంస్థ కార్యక్రమాల నిర్వహణకు విరాళాలు అందించి ప్రోత్సహించిన దాతలకు ప్రత్యేకంగా కృతజ్ఞతలు తెలిపారు. సభ్యుల సహకారం, దాతల మద్దతు, కార్యవర్గం కృషి వల్లే TFAS కార్యక్రమాలు విజయవంతంగా సాగాయని అన్నారు.
గత రెండేళ్లుగా సభ్యులతో ఏర్పడిన అనుబంధం, స్నేహబంధాలు తనకు మరపురాని జ్ఞాపకాలుగా నిలిచిపోతాయని అన్నా మధు పేర్కొన్నారు. ఈ స్నేహాలు, అనుభవాలు భవిష్యత్తులోనూ తనకు ఆనందాన్ని అందిస్తాయనే విశ్వాసాన్ని వ్యక్తం చేశారు.
ఈ సందర్భంగా కొత్త అధ్యక్షురాలిగా బాధ్యతలు స్వీకరిస్తున్న శ్రీమతి మాకం ఉమకు శుభాకాంక్షలు తెలియజేసిన ఆయన, ఆమె నాయకత్వంలో సంస్థ మరింత అభివృద్ధి సాధించి తెలుగు సమాజానికి విశిష్ట సేవలు అందించాలని ఆకాంక్షించారు. సభ్యులందరి ప్రేమ, ఆదరణకు కృతజ్ఞతలు తెలుపుతూ అధ్యక్ష పదవికి వీడ్కోలు పలికారు.
