ఫ్లోరిడాలోని తెలుగు ప్రవాసులను తెలంగాణ సంస్కృతి, సంప్రదాయాలతో ఒక్కచోట చేర్చే లక్ష్యంతో తెలంగాణ అసోసియేషన్ ఆఫ్ ఫ్లోరిడా (TGFL) ఆధ్వర్యంలో మయామి బోనాలు–2026 వేడుకలను ఘనంగా నిర్వహించనున్నారు. తెలంగాణ ఆధ్యాత్మికత, జానపద కళలు, సంప్రదాయాలను ప్రతిబింబించే ఈ వేడుక ఆగస్టు 2, 2026 (ఆదివారం) ఉదయం 11 గంటల నుంచి సాయంత్రం 4 గంటల వరకు జరగనుంది.
ఈ కార్యక్రమంలో సంప్రదాయ బోనం ఊరేగింపు, అమ్మవారికి ప్రత్యేక పూజలు, బోనాల వేడుకలు ప్రధాన ఆకర్షణగా నిలవనున్నాయి. అలాగే తెలంగాణ జానపద సంగీతం, సాంస్కృతిక ప్రదర్శనలు, ఉత్సాహభరితమైన తీన్మార్ డ్యాన్స్, వినోద కార్యక్రమాలు సందడి చేయనున్నాయి. కుటుంబ సభ్యులందరికీ వినోదాన్ని పంచే ప్రత్యేక కార్యక్రమాలతో పాటు రుచికరమైన తెలంగాణ వంటకాలు కూడా అందుబాటులో ఉంటాయి.
TGFL నిర్వాహకులు ఫ్లోరిడాలోని తెలుగు కుటుంబాలు, ముఖ్యంగా మయామి పరిసర ప్రాంతాల్లో నివసిస్తున్న తెలంగాణ ప్రజలు పెద్ద సంఖ్యలో హాజరై ఈ వేడుకలను విజయవంతం చేయాలని కోరారు. కార్యక్రమానికి ప్రవేశం ఉచితం కాగా, తప్పనిసరిగా RSVP నమోదు చేసుకోవాలని సూచించారు.
తెలంగాణ సంస్కృతి వైభవాన్ని విదేశీ గడ్డపై సజీవంగా నిలబెట్టే ఈ బోనాల వేడుకల్లో కుటుంబ సభ్యులు, స్నేహితులతో కలిసి పాల్గొని ఆధ్యాత్మికతతో పాటు సాంస్కృతిక వైభవాన్ని ఆస్వాదించాలని TGFL పిలుపునిచ్చింది.
