అమెరికాలోని డల్లాస్లో తెలంగాణ పీపుల్స్ అసోసియేషన్ ఆఫ్ డల్లాస్.. TPAD మరోసారి సామాజిక సేవలో తన ప్రత్యేకతను చాటుకుంది. రహదారి భద్రత, పరిశుభ్రత లక్ష్యంగా ‘అడాప్ట్ ఏ హైవే’ కార్యక్రమాన్ని నిర్వహించింది.
ఫ్రిస్కోలో అత్యంత రద్దీగా ఉండే ప్రెస్టన్ రోడ్లో ఈ క్లీనింగ్ డ్రైవ్ చేపట్టారు. SH 121 నుంచి మెయిన్ స్ట్రీట్ వరకు.. రెండు దిశల్లో కలిపి 2 మైళ్లకు పైగా రహదారి పరిసరాలను TPAD సభ్యులు శుభ్రం చేశారు.
ఈ కార్యక్రమం కేవలం రహదారి పరిసరాలను శుభ్రం చేయడానికే పరిమితం కాకుండా.. రోడ్ సేఫ్టీ, పర్యావరణ పరిశుభ్రతపై అవగాహన పెంచడమే ప్రధాన ఉద్దేశంగా కొనసాగుతోంది.
టెక్సాస్ డిపార్ట్మెంట్ ఆఫ్ ట్రాన్స్పోర్టేషన్.. TXDOTతో కుదుర్చుకున్న ఒప్పందంలో భాగంగా TPAD ఈ కార్యక్రమాన్ని నిర్వహిస్తోంది. ఒప్పందం ప్రకారం.. ప్రతి మూడు నెలలకు ఒకసారి రోడ్డు పక్కన పేరుకుపోయిన చెత్త, వ్యర్థాలు, ఇతర లిట్టర్ను తొలగించే బాధ్యతను TPAD తీసుకుంది.
రహదారి పక్కన చెత్త పేరుకుపోవడం వల్ల వాహనదారులకు, పాదచారులకు ఇబ్బందులు ఎదురయ్యే అవకాశం ఉంటుంది. ముఖ్యంగా రద్దీగా ఉండే రోడ్లపై ఇలాంటి వ్యర్థాలను తొలగించడం ద్వారా పరిసరాలు పరిశుభ్రంగా ఉండటంతో పాటు.. సురక్షితమైన ప్రయాణానికి కూడా దోహదపడుతుంది.
ఇక 2026లో TPAD చేపట్టిన మూడో హైవే క్లీనింగ్ కార్యక్రమం ఇది. ప్రతి కార్యక్రమంలో సభ్యులు స్వచ్ఛందంగా పాల్గొంటూ.. తమ కమ్యూనిటీ పట్ల బాధ్యతను చాటుతున్నారు.
అమెరికాలో స్థిరపడిన తెలుగు సమాజం.. కేవలం తమ కమ్యూనిటీ కార్యక్రమాలకే పరిమితం కాకుండా.. స్థానిక సమాజానికి కూడా సేవలందించడంలో ముందుంటోంది. అందులో భాగంగానే TPAD చేపడుతున్న ‘అడాప్ట్ ఏ హైవే’ కార్యక్రమం కొనసాగుతోంది.
రహదారుల పరిశుభ్రతతో పాటు.. రోడ్ సేఫ్టీ, కమ్యూనిటీ సర్వీస్, పర్యావరణ పరిరక్షణ అనే మూడు అంశాలను కలిపి ముందుకు తీసుకెళ్తున్న ఈ కార్యక్రమం.. TPAD చేపడుతున్న విలువైన సామాజిక సేవా కార్యక్రమాల్లో ఒకటిగా నిలుస్తోంది.
ఇక ముందు కూడా ప్రతి త్రైమాసికంలో ఈ హైవే క్లీనింగ్ కార్యక్రమాన్ని కొనసాగిస్తూ.. ఫ్రిస్కోలో పరిశుభ్రమైన, సురక్షితమైన రహదారి వాతావరణం కోసం TPAD తన వంతు కృషి చేయనుంది.
